Էրեբունի և Նուբարաշեն վարչական շրջանների ընդհանուր իրավասության դատարանում Վարդան Գրիգորյանի նախագահությամբ շարունակվեց «Օֆշորի գործի» դատական քննությունը:
Ամբաստանյալը Աշոտ Սուքիասյանը մեղադրվում է փողերի լվացման, առանձնապես խոշոր չափերի հարկերի վճարումներից խուսափելու համար: Աշոտ Սուքիասյանը, որպես «Ձորագյուղ» արտադրական կոոպերատիվի ղեկավար, ի թիվս այլ գործունեության, զբաղվել է ադամանդագործությամբ, ոսկեգործությամբ:
2010 թվականին նա դիմել է «Ամերիաբանկ»՝ աֆրիկյան Սիեռա Լեոնե երկրում իր կողմից շահագործվող ոսկու և ադամանդի հանքերից ոսկի ու ադամանդ արդյունահանելու, Հայաստան տեղափոխելու և Հայաստանում ադամանդագործությունը զարգացնելու նպատակով վարկ տրամադրելու հայտով:
Բանկը վարկային պայմանագրով Աշոտ Սուքիասյանի կոոպերատիվին տրամադրել է 12 միլիոն դոլար վարկ, որը հատկացվելու էր ոչ թե միանգամից, այլ աստիճանաբար, փուլ առ փուլ՝ ըստ բիզնեսի զարգացման տվյալների:
Բանկը 2010 թվականից մինչև 2011 թվականի հունիսի 15-ը Աշոտ Սուքիասյանին մաս-մաս տրամադրել է 10 միլիոն 700 հազար դոլար: Բայց նկատի ունենալով, որ վարկառուն սկսել է թերանալ իր պարտականությունների կատարման մեջ, բանկը բարձրացրել է վարկի տոկոսադրույքը՝ 12 տոկոսից հասցնելով 15 տոկոսի, ապա և բոլորովին չի տրամադրել մնացած 1 միլիոն 300 հազար դոլարը:
Վարկի տրամադրման համար բանկը որպես գրավ վերցրել է Աշոտ Սուքիասյանի հետ գործընկեր դարձած Փայլակ Հայրապետյանի՝ 50 միլիոն դոլար գնահատված գույքը, որից տուժող Հայրապետյանը արդյունքում զրկվել ու ներկա գործով ճանաչվել է որպես տուժող:
Ըստ Փայլակ Հայրապետյանի՝ բանկը իր որոշած վարկը մաս-մաս՝ ութ փոխանցումով ուղարկել է օֆշորային գոտի՝ Կիպրոս՝ երեք կազմակերպությունների, որոնցից մեկը Աշոտ Սուքիասյանի անունով է եղել, մյուսը՝ նախկին վարչապետ Տիգրան Սարգսյանի, երրորդը՝ Նավասարդ արքեպիսկոպոս Կճոյանի: Հետո, ըստ Հայրապետյանի, այդ գումարները վերադարձրել են Հայաստան, ծախսել իրենց հաճույքների համար, իսկ ինքը զրկվել է իր ունեցվածքից:
Նախորդ դատական նիստին տուժող Փայլակ Հայրապետյանն ավելացրել էր իր պաշտպանական թիմը: Ի թիվս ներկայացուցիչ Շ. Փիրուզյանի, ներգրավվել էին նոր ներկայացուցիչներ՝ փաստաբաններ Աշոտ Գևորգյանը, նրա դուստր Գոհար Գևորգյանը, փաստաբանի օգնական Կարեն Պողոսյանը:
Դատական այս նիստին տուժող Փայլակ Հայրապետյանը հրաժարվեց նախորդ նիստում ներգրավված փաստաբաններից ու փաստաբանի օգնականից՝ ասելով, թե վճարման հետ կապված խնդիրներ են եղել: Երկու փաստաբանի ու փաստաբանի մեկ օգնականի փոխարեն Փայլակ Հայրապետյանն այս նիստին միջնորդեց՝ որպես իր ներկայացուցիչ՝ ներգրավել Լուսինե Աղլամազյանին: Հիմա տուժողի ներկայացուցիչներն են Շ. Փիրուզյանը և Լ. Աղլամազյանը:
Դատարանում տուժող և ամբաստանյալ կողմերը քննարկեցին «Ամերիաբանկի» կողմից դատարանին տրամադրված տեղեկանքը՝ «Ձորագյուղ» արտադրական կոոպերատիվին տրամադրված վարկի մարման հետ կապված ֆինանսական շարժի վերաբերյալ:
Տուժողի ներկայացուցիչ Շ. Փիրուզյանը նշեց, որ 8 թերթից բաղկացած տեղեկանքի վերաբերյալ բազմաթիվ հարցեր ունի, լավ կլինի, որ հաջորդ նիստին ներկա լինի բանկի գլխավոր տնօրեն Արտակ Հանեսյանը ու պատասխանի կուտակված հարցերին:
Շ. Փիրուզյանն ասաց. «Միանշանակ համամիտ չեմ տեղեկանքի հետ: Ոչինչ չի հասկացվում…»:
Ըստ տուժողի ներկայացուցչի՝ հաշվի առնելով վարկի դիմաց գրավադրված գույքի մեծ մասի վաճառքի գները, վարկային պարտավորությունները պետք է որ արդեն իսկ մարված լինեին: Դեռ մի բան էլ բանկն է գրավի տիրոջը պարտք, ըստ Շ. Փիրուզյանի ենթադրության, սակայն բանկը նշում է, թե 2 միլիոն դոլարից ավելի՝ դեռ մարում պիտի կատարվի:
Վարկի մայր գումարը 9 միլիոն 700 հազար դոլար է, մարվել է 10 միլիոն 550 հազարը, որի մեջ ներառված են տույժ-տուգանքներ, վարկի սպասարկման գումար և այլն:
«Թյուրիմացությո՞ւն է, թե՞ կեղծիք, չեմ կարող ասել»,- ասաց Շ. Փիրուզյանը «Ամերիաբանկի» տեղեկանքում ներկայացված տվյալների մասին:
Նա պահանջեց, որ դատարանը «Ամերիաբանկից» պահանջի ամբողջ վարկային գործը՝ բոլոր քաղվածքներով՝ ի՞նչ գույք է վաճառվել մինչև այժմ, այդ գումարներից վարկի ո՞ր մասն է մարվել:
«32 հատորանոց գործ է, ոչ մի նման փաստաթուղթ չկա»,- ասաց Շ. Փիրուզյանը: Եթե, ասենք, Քոչարի 4/4 հասցեի գույքը վաճառվել է 1 միլիարդով, վարկից ինչքա՞ն է մարվել դրանից:
«Ներկայացված տեղեկանքում բազմաթիվ հակասություններ կան, պարզաբանումներ են հարկավոր»,- ասաց Շ. Փիրուզյանը, ում միացավ նաև ամբաստանյալի շահերի պաշտպան, փաստաբան Խաչատրյանը:
Ընդհանրապես, դատական այս նիստին տուժող և ամբաստանյալ կողմերը բանկի նկատմամբ ունեցած հարցադրումներում բավական միասնական էին: Պաշտպանը միացավ տուժողի ներկայացուցչի միջնորդությանը՝ դատարան հրավիրել ու լրացուցիչ հարցաքննել «Ամերիաբանկի» գլխավոր տնօրեն Արտակ Հանեսյանին:
Պաշտպան Խաչատրյանը ներկայացրեց Կենտրոն և Նորք-Մարաշ վարչական շրջանների ընդհանուր իրավասության դատարանի կայացրած վճիռը, որով 2014 թվականի հուլիսին Աշոտ Սուքիասյանի «Ձորագյուղ» արտադրական կոոպերատիվը սնանկ էր ճանաչվել՝ «Պրոմեթևս» բանկի պահանջների հետ կապված: Դատարանի այս վճիռը քրեական գործում չկար, պաշտպանն այն հայտնաբերել է պատահաբար: Եթե «Ձորագյուղը» դեռ 2014 թվականի հուլիսից սնանկ էր ճանաչվել, ուրեմն այդ ժամանակից բանկը նրանից տույժ-տուգանքներ պիտի որ չհաշվարկեր, սակայն այդպե՞ս է արդյոք…
Տուժողի ներկայացուցիչը միջնորդեց տուժող Հայրապետյանի կողմից գրավադրված ու բանկի կողմից դեռ չիրացված երկու անշարժ գույքի՝ Այգեստանում և Ծովազարդում գտնվող գույքերի վրա արգելանք դնել, մինչև քրեական գործի քննության ավարտը, որպեսզի բանկը այդ երկու գույքը գոնե չիրացնի:
Դատարանը որոշեց այդ միջնորդությանն անդրադառնալ բանկի գլխավոր տնօրեն Արտակ Հանեսյանի լրացուցիչ հարցաքննությունից հետո, որը տեղի կունենա դատական հաջորդ նիստին:
