Թուրքական Anadolu լրատվական գործակալության փոխանցմամբ՝ Թուրքիայի արտգործնախարար Մևլյութ Չավուշօղլուն հայտարարել է, որ Թուրքիան շարունակում է դիվանագիտական ջանքեր գործադրելը՝ նվազեցնելու համար Իրաքի հետ հարաբերություններում ծագած լարվածությունը, ինչը կապված է Բաշիքայի բազայում թուրք ռազմական հրահանգիչների ներկայության հետ։
Նախորդ տարվա դեկտեմբերից իրաքյան Մոսուլից հյուսիս ընկած Բաշիքայի բազայում շարունակում են մնալ մոտ 500 թուրք զինծառայողներ, որոնք իրականացնում են սուննի աշխարհազորի ու իրաքյան քրդերի ջոկատների ռազմական ուսուցում։
Չավուշօղլուն հայտարարել է. «Բաշիքայի շուրջ տիրող իրավիճակը ստեղծեց ոչ անհրաժեշտ լարվածություն։ Չպետք է լիներ նման անհրաժեշտություն։ Սակայն մենք շարունակում ենք դիվանագիտական ջանքերը հարաբերությունները կարգավորելու համար»։
Նա ընդգծել է, որ Թուրքիայի ԱԳՆ-ի խորհրդականը նախորդ շաբաթ այցելել է Իրաք, իսկ օրեր անց ակնկալվում է Անկարա իրաքյան պատվիրակության այցը։
Չավուշօղլուի խոսքերով՝ Թուրքիան նաև ողջունում է Իրանի արտգործնախարար Մոհամմադ Ջավադ Զարիֆի պատրաստակամությունը միջնորդական դեր խաղալու Անկարայի ու Բաղդադի միջև հարաբերությունները կարգավորելու համար.
«Թուրքիան ողջունում է միջնորդական բոլոր ջանքերն այդ հարցում։ Իրաքը Թուրքիայի համար եղբայրական երկիր է։ Բաղդադում բոլորից լավ գիտեն, որ մենք մեծ կարևորություն ենք տալիս Իրաքի տարածքային ամբողջականությանը»։
