Թվում է, թե Հայաստան-Թուրքիա հարաբերությունների կարգավորման խնդիրը հիմա փոշոտվում է խոր դարակներից մեկում, սակայն «Քաղաքացիական համաձայնություն» հասարակական կազմակերպությունը սկսել է հանդիպումների և թրեյնինգների շարք, որոնք նվիրված են հենց այս խնդրին։
Խորհրդանշական է, որ թեման մեծ արձագանք է առաջացրել Հայաստանի քաղաքական ակտիվ երիտասարդների շրջանակներում, որոնք էլ հենց նախաձեռնության հիմնական թիրախն են՝ այն ենթադրությամբ, թե նրանք էլ լինելու ապագայի լիդերները, ապագայի որոշում ընդունողները, և հարցի նկատմամբ համակողմանի պատկերացում ունենալը կլինի կարևոր ռեսուրս, որը հետագայում հնարավորություն կտա հարցին մոտենալ ոչ թե էմոցիաների, այլ տեղեկատվության և շահերի տեսանկյունից։
Այս շարքի հերթական քննարկումը տեղի ունեցավ անցած հանգստյան օրերին Ծաղկաձորում։ Հանդիպմանը մասնակցում էին երիտասարդ լիդերները տարբեր հայաստանյան կուսակցություններից և հասարակական կազմակերպություններից։ Բանախոսներից Դավիթ Շահնազարյանը կարևոր շեշտադրումներ կատարեց երկու հանգամանքի վրա. առաջին՝ նպատակահարմար և ռեալիստական համարեց քննարկումները հենց Հայաստան-Թուրքիա միջպետական հարաբերությունների կարգավորման շուրջ՝ հայ-թուրքական հարաբերությունների կարգավորումը համարելով շատ ավելի ընդգրկուն խնդիր, որը թերևս պետք է հաջորդի այս փուլին, և երկրորդ՝ չնայած ներկա պահին այս հարաբերությունների կարգավորումը անիրատեսական է թվում, սակայն ժամանակ առ ժամանակ տարածաշրջանում առաջանում են պայմաններ, որոնք հնարավորություններ են ստեղծում այս հարաբերությունների քննարկման համար։
Որպես վերջինիս օրինակ պարոն Շահնազարյանը նշեց Սու-24 ինքնաթիռի խոցումից հետո ռուս-թուրքական 7-ամսյա սառեցումը, ինչը Հայաստանին այս բնագավառում որոշակի ավտոնոմիայի հնարավորություններ էր ստեղծել։
Քննարկման բոլոր մասնակիցները համաձայնեցին, որ Հայաստան-Թուրքիա հարաբերությունների քննարկումը անհնար է տարանջատել Ղարաբաղյան խնդրի լուծումից։
«Քաղաքացիական համաձայնություն» հասարակական կազմակերպության խորհրդատու Գեղամ Սարգսյանը ուշադրություն հրավիրեց այն հանգամանքի վրա, որ միջոցառումը հովանավորվել է Մեծ Բրիտանիայի Միացյալ Թագավորության Համագործակցության և արտաքին հարաբերությունների գրասենյակի կողմից, ինչը նշանակում է, որ չնայած ԵՄ-ից դուրս գալուն՝ Մեծ Բրիտանիան շարունակում է մեր տարածաշրջանը պահել իր արտաքին հարաբերությունների ուշադրության կենտրոնում։
Լուսանկարը՝ aravot.am-ի
