«Իրազեկ և պաշտպանված» ՀԿ-ի նախագահ Բաբկեն Պիպոյանի կարծիքով՝ մի քանի հոգով հնարավոր չէ պայքարել բոլոր ոլորտներում. «Երբ մենք ասում ենք, որ մենք պետք է հանրային ճնշումների միջոցով պայքարենք մեր իրավունքների համար, մարդիկ չեն միանում։ Արդեն ինչ-որ գին թանկացնելուց հետո նոր ոտքի են կանգնում: Պետք է լուծման մեխանիզմներ առաջարկել, ոչ թե միայն բողոքել»:
Նա նշեց, որ գազի գնի թանկացման ժամանակ բոլոր քաղաքական ուժերը տնտեսագիտական մեկնաբանություն էին տալիս, իսկ տրանսպորտի թանկացման ժամանակ քաղաքապետարանը ոչինչ չի նշում. «Մենք ավտոբուսներ ենք նվեր ստացել, բայց դրանց պահելու համար քաղաքապետարանը գոնե ծախսեր չի անում։ Տրանսպորտի գին են բարձրացնում: Իրենց ուռճացրած թվերը անգամ եթե ճիշտ են, հնարավոր չէ, որ տրանսպորտի գինն այդքան թանկանա»:
Նրա մեկնաբանությամբ՝ քաղաքապետարանը խեղաթյուրում է տրանսպորտից օգտվող ուևորների թվերը, իսկ թանկացումն անհիմն է. «Չի կարելի ծաղրել ժողովրդին, չի կարելի նման թվեր տալ և անհիմն բարձրացնել տրանսպորտի գինը»:
Նշենք, որ երեկ քաղաքապետարանի հայտարարության համաձայն՝ տրանսպորտավճարը թանկացել է, քանի որ ավելացել են ավտոպահեստամասերի ծախսերը, սակայն բանախոսն ասաց, որ վերջին տարիներին Վրաստանից ավտոմասեր ներկրելու շնորհիվ դրանց գինն անգամ իջել է:
Քաղաքապետարանից հայտարարել են նաև, որ քաղաքի մի ծայրից մյուսը գնալիս ավտոբուսները տեղափոխում են 15 մարդ, ինչը ավտոբուսների վրա արվող ծախսերին չի բավարարում: Բանախոսն ասաց, որ սա աբսուրդ է, քանի որ հնարավոր չէ քաղաքի մի ծայրից մյուսը հասնելու համար ավտոբուսը որևէ կանգառում չկանգնի, մի կանգառից նստի 15 ուղևոր և մինչև վերջին կանգառը չիջնի։
«Եթե երեկ ֆեյսբուքյան ակտիվությունը չլիներ, այս հայտարարությունն էլ չէին անի: Իսկ ինչու մենք ավելի վաղ չէինք պաշտպանում մեր շահերը, որ այժմ արդեն ընդունված օրենքի դեմ ենք պայքարում»,- եզրափակեց նա:
Լուսանկարը՝ PanARMENIAN Photo-ի