ՀԱԿ փոխնախագահ Լևոն Զուրաբյանն օրեր առաջ կայացած մամլո ասուլիսում հայտարարեց նախագահ Սերժ Սարգսյանին իմպիչմենթ հայտնելու Կոնգրեսի մտադրության մասին: Կոնգրեսը հռչակեց իմպիչմենթ հայտնելու իրավաքաղաքական հիմքերը՝ հղում անելով Սահմանադրության 57-րդ հոդվածի առաջին մասին՝ «Հանրապետության Նախագահը կարող է պաշտոնանկ արվել դավաճանության կամ այլ ծանր հանցագործության համար»: Կոնգրեսը մասնավորեցնում է Սերժ Սարգսյանի մասնակցությունը մարտիմեկյան իրադարձություններին, ընտրությունների կեղծումը, բայց նրանց հրապարակման համաձայն՝ Ս․ Սարգսյանը խախտել է Ընտրական օրենսգրքի 78.1 հոդվածի պահանջը, ըստ որի` ՀՀ վարչապետը չի կարող պաշտոնավարել` միաժամանակ լինելով նաև ՀՀ նախագահի թեկնածու՝ բացառությամբ այն դեպքի, երբ վարչապետը նաև հանրապետության նախագահի պաշտոնակատար է, և այլն:
Միևնույն ժամանակ, քաղաքական ուժերը նշում են, որ նախագահին իմպիչմենթ կարելի է հայտնել նաև այն բանի համար, որ նա, գերազանցելով իր լիազորությունները, ՎՊ նախագահ Իշխան Զաքարյանի զեկույցին շատ կոպիտ է հակադարձել:
«Առաջին լրատվական»-ի հետ զրույցում ԵՊՀ իրավաբանական ֆակուլտետի սահմանադրական իրավունքի ամբիոնի դոցենտ Վարդան Այվազյանը նշեց, որ Սահմանադրության մեջ նախագահին իմպիչմենթ հայտնելու բացառապես մեկ հիմք կա՝ դա պետական դավաճանությունը կամ ծանր հանցագործությունն է, բայց Հայ ազգային կոնգրեսը պետք է ցույց տա, թե ինչ հիմք ունի նման բան ասելու համար, այլապես այս ամենը, նրա խոսքերով, «հեքիաթի է նման»։
«Ընդհանրապես նախագահին իմպիչմենթի ենթարկում են հետևյալ կերպ՝ Ազգային ժողովը ձայների ընդհանուր թվի մեծամասնությամբ դիմում է Սահմանադրական դատարան, Սահմանադրական դատարանը պետք է տա դրական եզրակացություն իմպիչմենթի հիմքերի վերաբերյալ, այսինքն իրականում նախագահի կողմից ծանր հացագործություն կամ հայրենիքի դավաճանություն եղե՞լ է, թե՞ ոչ: Եթե Սահմանադրական դատարանը դրական եզրակացություն չի տալիս, ապա հարցն ընդհանրապես օրակարգից դուրս է գալիս, իսկ եթե տալիս է, ապա Ազգային ժողովը ձայների ընդհանուր թվի երկու երրորդով կարող է իմպիչմենթի ենթարկել նախագահին: Բայց կրկնում եմ՝ իմպիչմենթ հայտնում են միայն մեկ հոդվածով՝ պետական դավաճանության կամ այլ ծանր հանցագործության և ոչ թե՝ քաղաքական նկատառումներով»:
Վարդան Այվազյանը հավելեց, որ Հայ ազգային կոնգրեսը բացի այն, որ պետք է հիմնավորի Սահմանադրութան այդ կետը, պետք է նաև 2/3 մեծամասնություն ունենա խորհրդարանում, այլապես նախաձեռնությունն արդեն իսկ անլուրջ է:
