«Սերժ Սարգսյանի թե՛ շնորհակալությունը, թե՛ ներողությունը ընդհանրապես անարժեք են հատկապես ազատ, չվերահսկվող մամուլի համար»,- «Առաջին լրատվական»-ի հետ զրույցում անդրադառնալով Սերժ Սարգսյանի ելույթին, ասաց Մամուլի ազգային ակումբի նախագահ Նարինե Մկրտչյանը։ «Այնպիսի անօրեն երկրում, ինչպիսին նա դարձրել է Հայաստանը, Սերժ Սարգսյանի ներողությունը ձևական բնույթ էր կրում, մանավանդ որ լրագրողների հանդեպ բռնությունները հստակ ծրագրավորված էին։ Մենք ոչ միայն չենք մոռանալու, այլ հիշելու և պահանջելու ենք»,- հավելեց տիկին Մկրտչյանը։
Հիշեցնենք, որ Սերժ Սարգսյանը օրերս անդրադառնալով հուլիսի 29-ի լույս 30-ի գիշերը Սարի թաղում տեղի ունեցած դեպքերին, լրագրողների նկատմամբ բռնություններին ու ծեծին, նրանց հորդորեց մոռանալ կատարվածը։ «Ես նաև ներողություն եմ խնդրում մեր լրագրողներից հուլիսի 29-ի՝ լույս 30-ի գիշերվա դեպքերի համար. սա մեր ամենաէական բացթողումն էր այս օրերի ընթացքում: Բոլոր հետևություններն անշուշտ, արվելու են: Ձեր ներողամտությունը հայցելով՝ միայն լրագրողներին, բայց ոչ իրավապահներին, խնդրում եմ մոռանալ այդ դեպքերի մասին, քանի որ իրոք վստահ եմ, որ այլևս նման բան չի կրկնվելու, և նաև ուզում եմ, որ այդ դեպքերն այսուհետ անգամ ենթագիտակցական որևէ ազդեցություն չունենան ձեր ազատ գործելաոճի վրա»,- ասել էր Սերժ Սարգսյանը։
Նարինե Մկրտչյանի խոսքերով՝ այս ամենը քրեական հանցագործություններին, բռնություններին իրավական գնահատական տալու փոխարեն ներողությամբ բավարարվելը, այդ բռնությունների հեղինակներին շնորհակալություն հայտնելը փաստում է այն մասին, որ Սերժ Սարգսյանը այդպես էլ որևէ հետևություն չի արել 15 օր շարունակ Հայաստանում տիրած արտակարգ վիճակից , որի պատճառները ևս գնում են դեպի իշխանություն։ «Հայաստանում երեխայի համար անգամ պարզ էր, որ Սերժ Սարգսյանը հետևություններ չի արել ու չի անելու թե՛ ապրիլյան, թե՛ հուլիսյան դեպքերից: Նրա վերջին ելույթը վկայեց, որ Հայաստանում ոչինչ չի փոխվի, ավելի ճիշտ՝ կփոխվի դեպի վատը, քանի դեռ նրա վարչախումբը չի հեռացել իշխանությունից: Նա շնորհակալություն էր հայտնում նրանց, ովքեր օգնեցին, որ շարունակվի իր՝ երկրի համար աղետալի իշխանությունը։ Ծավալվող իրադարձությունները ցույց տվեցին, որ Սերժ Սարգսյանի վերջին հենարանը մնացել է ոստիկանությունը, ընդ որում՝ պատժիչ ոստիկանութունը և քրեածին տարրերը, որոնց էլ շնորհակալություն էր հայտնում: Դրանով իսկ ի ցույց դնելով, որ հետայսու ևս նրանց վրա է հենվելու»,- նկատեց տիկին Մկրտչյանը:
