ՀԿ ԳՄ երեկվա նիստից հետո, միաձայն որոշում է կայացվել, որ Սյունիքի մարզպետի պաշտոնը զբաղեցնելու է ՀՀԿ խորհրդի անդամ, ՀՀ ԱԺ պատգամավոր Վահե Հակոբյանը:
Նշենք, որ Վահե Հակոբյանի հայրը՝ Մաքսիմ Հակոբյանը ՀՀ ամենախոշոր ընկերություններից մեկի՝ «Զանգեզուրի պղնձամոլիբդենային կոմբինատի» տնօրենն է:
eMedia.am-ը ներկայացրել է Սյունիքի մարզպետ Վահե Հակոբյանի կենսագրությունն ու եկամուտները:
Կենսագրություն.
Ծնվել է 1977թ. մայիսի 18-ին քաղաք Քաջարանում: 1994-1999թթ. սովորել է Երևանի Ժողովրդական տնտեսության ինստիտուտում եւ ստացել է տնտեսագետի որակավորում:
1999թ. ընդունվել է Հայաստանի Հանրապետության ֆինանսների եւ էկոնոմիկայի նախարարության տնտեսագիտական հետազոտությունների ինստիտուտի ասպիրանտուրան: 1999 թվականին հանդիսացել է «ԱՎՍԱՓ» ՍՊԸ-ի խորհրդի նախագահ:
2000-2002թթ. աշխատել է Հայաստանի Հանրապետության պետական գույքի կառավարման նախարարության մոնիտորինգի եւ աուդիտի վարչության մոնիտորինգի բաժնի պետ:
2003թ. պաշտպանել է գիտական թեզ եւ ստացել տնտեսագիտական գիտությունների թեկնածուի գիտական աստիճան:
2003-2004թթ. աշխատել է «Զանգեզուր Մայնինգ» ընկերության գործադիր տնօրեն:
2004-2007թթ.` Ազգային ժողովի պատգամավոր (թիվ 52 ընտրատարածք): Ազգային ժողովի ֆինանսավարկային, բյուջետային եւ տնտեսական հարցերի մշտական հանձնաժողովի անդամ: Խմբակցություններում եւ պատգամավորական խմբում չի ընդգրկվել:
2007-2012թթ.` Ազգային ժողովի պատգամավոր (թիվ 38 ընտրատարածք): 19.06.2007-07.05.2008թթ.` Ազգային ժողովի պետական-իրավական հարցերի մշտական հանձնաժողովի անդամ, 07.05.2008-05.02.2010թթ.` մարդու իրավունքների պաշտպանության եւ հանրային հարցերի մշտական հանձնաժողովի անդամ, 05.02.2010-31.05.2012թթ.` տնտեսական հարցերի մշտական հանձնաժողովի անդամ: 2012թ. մայիսի 6-ին Ազգային ժողովի պատգամավոր է ընտրվել թիվ 38 ընտրատարածքից:
Ամուսնացած է, ունի երկու երեխա:
Վահե Հակոբյանի սեփականություններն ու փողերը.
Վահե Հակոբյանն իրեն գործարար չի համարում, սակայն իր գույքի հայտարարագրում նշել է, որ Երևան քաղաքում ունի 3 բնակարան, Երևանում և մարզերում՝ 6 շենք-շինություն, 6 հողամաս:
Արդեն նախկին պատգամավորը հայտարարագրել է 6 ավտոմեքենա, որոնցից 3-ը 2011թ. արտադրության: Վահե Հակոբյանն ունի «Գազ 3102», «Mercedes G500», «Տոյոտա Քեմրի», «Porsche Panamera», «Porsche Cayene», «Wolkswagen Golf» մակնիշի ավտոմեքենաներ:
Վահե Հակոբյանը վերջին մեկ տարվա ընթացքում ԱԺ-ից ստացել է 3 մլն 135 հազ. 310 դրամ աշխատավարձ, «Արմենիա Մոլիբդեն Փրոդաքշն» ՍՊԸ-ից ստացել է 1 միլիարդ 175 միլիոն դրամ շահաբաժին, իսկ «Նիաշ» ՍՊԸ-ից ստացած շահաբաժինը կազմում է 180 միլիոն դրամ:
Վահե Հակոբյանը «Հայբիզնեսբանկ» ՓԲԸ-ից վերջին մեկ տարվա ընթացքում ստացել է 41 միլիոն 242 հազար 193 դրամ, իսկ «ԱԿԲԱ Կրեդիտ ԱգրիկոլԲանկ» ՓԲԸ-ից` 15 միլիոն 787 հազար դրամ: Պատգամավորը որպես եկամուտ նշել է նաև «Նիաշ» ՍՊԸ-ից ստացած փոխառությունը` 10 միլիոն դրամ:
Վահե Հակոբյանն ըստ վերջին տվյալների ունեցել է 1 միլիարդ 270 միլիոն դրամ:
