Երկրում տեղի ունեցող քաղաքական խմորումներից ոչ կշահի ընդդիմությունը, ոչ էլ՝ իշխանությունը: Այս մասին այսօր «Առաջին լրատվական»-ի հետ զրույցում ասաց Հայաստանի սոցիոլոգների ասոցիացիայի նախագահ, սոցիոլոգ Գևորգ Պողոսյանը՝ խոսելով այն մասին, թե ինչպես հասարակությունը կընկալի ՎՊ հաշվետվության շուրջ տեղի ունեցող ներիշխանական խմորումները:
Սոցիոլոգը համոզված նշեց, որ «իշխանության նկատմամբ հանրային վստահությունն ավելի նվազում է ոչ թե այն պատճառով, որ թերացումների մասին հասարակությունը չգիտեր (իհարկե՝ գիտեր, գիտեր, որ թերացումներ են լինում, հափշտակումներ են լինում, դրանք չեն բացահայտվում, հարուցված քրեական գործերը մինչև վերջ չեն հասնում), այլ այն պատճառով, որ մեղավորներն իրենց արժանի պատիժը չեն կրում»:
«Այն փաստը, որ այդ յուրացումների մասին հրապարակային զեկուցվում է ԱԺ-ում և հետևանքներ չեն լինում, իշխանությունը չի արձագանքում, ինչպես ժողովուրդն է ընկալում այդ գործընթացները, այսինքն՝ անմիջապես պատժում մեղավորներին, որպեսզի հաջորդ անգամ նույն բանը չկրկնվի, դառնում է քննարկման առարկա, մեկնաբանվում է որպես կուսակցական խժդժություն, այսինքն՝ բոլորովին այլ որակումներ են տրվում, որն էլ հիասթափեցնում է հասարակությանը: Եթե պատժվեին, կլիներ նորմալ գործընթաց, և իշխանության նկատմամբ վերաբերմունքը դրական կդառնար: Բայց հիմա դա վերածվում է ինչ-որ ներկուսակցական , ներիշխանական խնդիրների, որից մարդիկ էլ ավելի շատ են հիասթափվում»,- տեսակետ հայտնեց Գևորգ Պողոսյանը:
Վերջինս, անդրադառնալով ընդդիմությանն, ասաց, որ այն, իհարկե, կարող էր այդ իրավիճակն օգտագործել հօգուտ իրեն, բայց այն ընդդիմությունը, որն ունենք այսօր և այն ընդդիմությունը, որը ձևավորվեց ՀՀ նախագահական և Երևանի ավագանու ընտրություններից հետո, ի զորու չէ օգտվել այս իրավիճակից: «Հասարակությունը լուրջ ակնկալիքներ ուներ ընդդիմությունից, բայց ընտրական գործընթացների ընթացքում հիասթափություն ապրեց, և մտածել, թե ընդդիմությունն այս անգամ առիթից կօգտվի, անիմաստ է: Փորձը ցույց է տալիս, որ շատ ավելի լուրջ առիթներից, ցավոք սրտի, այդ ընդդիմությունը չկարողացավ և չօգտվեց: Եթե ընդդիմությունն ունենա այն պահվածքը, որը մինչև այսօր ունի, լուսանցքում է մնալու»,- ասաց Գևորգ Պողոսյանը՝ եզրափակելով, որ երկրում այսօր տեղի ունեցող քաղաքական գործընթացներից՝ խմորումներից ոչ ընդդիմությունը կշահի, ոչ էլ՝ իշխանությունը:
