ԱՄՆ-ը կորցնում է ԵՄ-ի վրա դիվանագիտական ազդեցության լծակները միությունից դուրս գալու Մեծ Բրիտանիայի որոշումից հետո: Այս մասին գրում է The New York Times-ը:
Նշվում է, որ երկար ժամանակ Բրիտանիան եղել է ԱՄՆ-ի ամենահուսալի եվրոպական գործընկերը անվտանգության, հետախուզության և առևտրի ոլորտներում: Հազիվ թե մայրցամաքում գտնվի երկիր, որն այդքան ուժեղ համակրեր ԱՄՆ-ին և «սեղմեր կշեռքի նժարները եվրոպական դեբատներում», որպեսզի արդյունքը բարենպաստ լիներ Վաշինգտոնի համար:
NYT-ն գրում է, որ Brexit-ը Արևմուտքի համար շատ անհարմար պահի եղավ. ԱՄՆ-ը և դաշնակիցները Ռուսաստանի հետ հարաբերությունների կառուցման, ՆԱՏՕ-ի ամրապնդման, սիրիական ճգնաժամի կարգավորման, ԵՄ-ԱՄՆ առևտրային համաձայնագրի ձևավորման միջոցներ են փնտրում: Բլոկից Բրիտանիայի դուրս գալը նաև կասկածի տակ է դրել ԱՄՆ երկարաժամկետ ծրագիրը, ըստ որի՝ ԵՄ-ի դերն իր տարածաշրջանում և Մերձավոր Արևելքում աստիճանաբար կաճի՝ մինչ Վաշինգտոնն ավելի շատ կկենտրոնանա Ասիայի վրա:
ԱՄՆ-ը ստիպված կլինի նոր ռազմավարություն մշակել՝ շարունակում է թերթը: Եթե նախկինում Վաշինգտոնը չէր ծրագրում լուրջ ջանքեր ձեռնարկել ԵՄ-ի հետ հարաբերությունների վերանայման ուղղությամբ, ապա այժմ այդ աշխատանքը կպահանջի մի քանի տարի:
