Ըստ ՀՀ բնապահպանության նախկին նախարար, բնապահպան Կարինե Դանիելյանի՝ Հայաստանն այն եզակի երկրներից է, որտեղ բնության հուշարձանները և մարդու ձեռքով սարքված պատմամշակութային հուշարձաններն իրար մոտ են, և շատ կարևոր է, որ դրանց մեծ մասը գրանցվեն ՅՈւՆԵՍԿՕ-ի ցանկում: Այսօր լրագրողների հետ հանդիպմանը նա ցավով նշեց, որ հուշարձանները խնամելու և աշխարհին ցույց տալու փոխարեն դրանց կողքին ռեստորաններ ենք կառուցում, պղծում դրանք. «Նորավանքը չգրանցեցին ՅՈւՆԵՍԿՕ-ի ցանկում հենց այն պատճառով, որ տարածքում ռեստորան կար»:
Հուշարձանների ոչնչացման ցանկում Կարինե Դանիելյանը նշեց նաև Երևանը. «Մենք Երևանում ամեն ինչ կամ պղծել ենք, կամ քանդել: Հյուսիսային պողոտայում 18-րդ դարից մնացած 29 շենք հողին հավասարեցվեց, դատական գործընթաց ծավալվեց, բայց չգիտես ինչպես՝ ավարտվեց»:
Բանախոսն ասաց, որ Երևանի հարավում այնքան ասֆալտ և բետոն են լցրել, այնքան շենքեր են կառուցել, որ Երևանի օդը լրիվ աղտոտվել է, դրան գումարվել են նաև օձերն ու կարիճները. «Երևանի շինարարությամբ օձերին, կարիճներին ասում ենք՝ էստի համեցեք, նրանք էլ գալիս են»:
Ասուլիսի մյուս բանախոս ճարտարապետ Լևոն Իգիթյանը, խոսելով Երևանի ճարտարապետության, մասնավորապես հրապարակի փոփոխության մասին, ասաց, որ արդեն 8-9 մրցույթ է հայտարարվել, բոլորն էլ մերժվել են. «Այս մրցույթով մենք որոշեցինք հասկանալ՝ ինչ են ուզում երևանցիները: Մեշոկներով նամակներ կան հրապարակի փոփոխության վերաբերյալ, չգիտես ինչու, բայց ուզում են ձևափոխություն անել»:
Լևոն Իգիթյանը պատկերասրահի շենքը համարեց անճաշակ և հակաճարտարապետական կառույց: Տիկին Դանիելյանը չհամաձայնեց այս կարծիքին, ասաց, որ եթե դա էլ քանդվի, մայրաքաղաքն ամբողջությամբ կկորցնի իր տեսքը. «Սնկի նման շենքեր են բարձրացել, փակել են Օպերան՝ չնայած օրենքով ասվում է՝ Օպերայի հարակից շենքերը չպիտի լինեն դրանից բարձր»:
