Հայաստանի հողային ռեսուրսների 81 տոկոսն այսօր անապատացած է: Հողերի անապատացումը բերում է ջրերի, անտառների, հողային ռեսուրսների փոփոխության, դեգրադացման գործընթաց է տեղի ունենում: Այսօր լրագրողների հետ հանդիպմանն այս մասին ասաց բնապահպան, «Էկոլուր» ՀԿ-ի նախագահ Ինգա Զարաֆյանը Նա նաև հավելեց, որ այդ հողերն աղակալում են, Արարատյան դաշտում 600 հազար հեկտար հողերից 30 հազար հեկտարն արդեն պիտանի չէ օգտագործման համար. «Առաջ դրենաժային համակարգեր էին սարքում, ինչ-որ կերպ պահպանում էին հողը, հիմա ոչինչ չի արվում, իսկ ճնշումը շատ ավելի մեծ է: Ձկնաբուծարանները վերցնում են ստորգետնյա ջրերը, խաթարում էկոհամակարգը և որևէ պատասխանատվության չեն ենթարկվում»:
Տիկին Զարաֆյանը համոզված է` պետք է ողջ պետական քաղաքականությունը փոխել, հողի, ջրի, անտառային ռեսուրսների վերաբերյալ օրենքներում փոփոխություններ կատարել. «Այժմ այդ օրենքներում սպառողի իրավունքն է հաստատված, սակայն անընդհատ չի կարելի սպառել, եթե ուզում ենք անդառնալի կորուստներ չունենալ, պետք է հրաժարվենք ընդերքի մասին օրենսգրքից, որը խրախուսում է սպառողական օրենքները»:
Բանախոսն ասաց, որ ամեն տարի հանրապետությունում գյուղատնտեսական նշանակության հողեր ենք կորցնում, որովհետև դրանք արտադրական թափոններով են լցվում:
Ասուլիսի մյուս բանախոս, ակտիվիստ Անի Կաղինյանն էլ հավելեց, որ այս պայքարը բոլորիս պայքարն է` անկախ մասնագիտությունից, սոցիալական դիրքից. «Մեր իշխանությունների անտարբերության հետևանքով անընդհատ լուրջ կորուստներ ենք ունենում։ Պետք է, անկախ մասնագիտությունից, համախմբվենք և պահանջենք ապրել մաքուր երկրում»:
Հիշեցնենք, որ այսօր Անապատացման դեմ պայքարի միջազգային օրն է:
Լուսանկարը՝ PanARMENIAN Photo-ի
