Ռումինիայի բնակչության գրեթե քառորդ մասը նյութական ծանր զրկանքներ է կրում: Այդ մասին հայտնում Է եվրոպական վիճակագրական Eurostat գործակալությունը՝ փոխանցում է TASS-ը։
Ըստ գործակալության չափանիշների՝ ծայրահեղ աղքատության պայմաններում են ապրում, օրինակ, այն անձինք, որոնց չի հաջողվում վճարել բնակարանի ջեռուցման ամենամսյա հաշիվները կամ վերցնել ամենամյա արձակուրդի գոնե մեկ շաբաթը:
Գործակալության տվյալների համաձայն՝ 2015 թվականին Ռումինիայում 4,9 մլն մարդ կամ բնակչության 24,6 տոկոսը տառապել է ծայրահեղ աղքատությունից: Այսպիսով, Ռումինիան ցածր կենսամակարդակ ունեցող եվրոպական երկրների ցուցակում երկրորդ տեղն է զբաղեցնում Բուլղարիայից հետո, որտեղ նյութական ծանր զրկանքների է բախվում բնակչության 34,2 տոկոսը կամ 2,5 մլն մարդ:
Վիճակագրական տվյալների համաձայն՝ վերջին տարիներին Ռումինիան, այնուամենայնիվ, հասել է որոշակի առաջընթացի: 2012 թվականին աղքատության ցուցանիշը կազմել է 29,9 տոկոս, 2013 թվականին՝ 28,8 տոկոս, իսկ 2014 թվականին՝ 26,3 տոկոս:
Եվրամիության երկրների թվում աղքատության ամենացածր մակարդակը գրանցվել է Շվեդիայում՝ 2014 թվականին՝ 0,7 տոկոս: Նույն տարում Գերմանիայի բնակչության չքավոր խավերի բաժինը կազմել է 5 տոկոս, իսկ Ֆրանսիայում՝ 4,8 տոկոս:
Եվրամիության երկրների թվում 2015 թվականին աղքատության մեջ ապրող մարդկանց թիվն առավել մեծ է եղել Իտալիայում՝ գրեթե 7 միլիոն կամ բնակչության 11,5 տոկոսը:
Իսկ Եվրամիությունում այդ տարի ծայրահեղ աղքատության մեջ ապրողների ընդհանուր թվաքանակը եղել է ավելի քան 41 մլն կամ բնակչության 8,2 տոկոսը։
