Պեկինի իշխանությունները մտադիր են 2016թ. էկոլոգիական վիճակի բարելավմանն ուղղված միջոցառումների շրջանակներում արգելել քաղաքի ճանապարհներին մոտ 200 հազար ավտոմեքենաների երթևեկությունը: Այս մասին հայտնում է Չինաստանի միջազգային ռադիոն (CRI)՝ հղում անելով իշխանություններին: Այս մասին հայտարարել է Պեկինի շրջակա միջավայրի պաշտպանության հարցերով քաղաքային բյուրոյի ղեկավարի տեղակալ Ֆան Լին:
Նրա խոսքով՝ իշխանությունների ուշադրության կենտրոնում կլինեն դիզելով աշխատող ավտոմեքենաները և շինարարական աղբ տեղափոխող մեքենաները:
Իշխանությունները նաև ծրագրում են խստացնել ածխի փոխադրման, վաճառքի և օգտագործման արգելքը քաղաքի արևելքում և արևմուտքում: Իսկ Պեկինի մոտ գտնվող 400 բնակավայրեր կանցնեն գազի օգտագործման:
