Դեմոկրատական կուսակցությունից ԱՄՆ նախագահի պաշտոնին հավակնող Բեռնի Սանդերսը իր մրցակից Հիլարի Քլինթոնին մեղադրել է երկրի խոշոր բանկերի հետ չափազանց սերտ կապերի մեջ: Այս մասին հայտնում է RIA Novosti-ն:
«Իհարկե, նախկին պետքարտուղարը (Քլինթոնը) մի քիչ նյարդայնանում է, քանի որ մարդիկ հարցնում են՝ ինչպես է նրա նախընտրական հիմնադրամը միլիոնավոր դոլարներ ստացել Ուոլ-Սթրիթից»,- ասել է Սանդերսը Հարավային Կարոլինայում ընտրողների հետ հանդիպմանը:
Նրա ելույթը ցուցադրել են ամերիկյան հեռուստաալիքները: Նա նաև հիշեցրել է, որ Քլինթոնը վճարովի ելույթներով հանդես է եկել Ուոլ-Սթրիթի խոշորագույն ներդրումային բանկերի կազմակերպած միջոցառումներին: Այդպիսի ելույթներից մեկի համար Քլինթոնը ստացել է ավելի քան 200 հազար դոլար:
Քլինթոնին կոչ են անում տարածել այդ ելույթների տեքստերը, սակայն նա հրաժարվում է՝ մինչև նույնը չանեն մյուս թեկնածուները: Սանդերսը կատակել է այդ թեմայով: «Պատրաստ եմ տարածել իմ բոլոր վճարովի ելույթները: Ահա դրանք»,- ասել է Սանդերսը՝ ժեստ անելով, կարծես սեղանի վրա թղթեր է դնում: «Դրանք պարզապես չկան»,- հավելել է նա: Վերմոնտի սենատորի խոսքով՝ ինքը հավաքել է 4 մլն-ի նվիրատվություն, բայց դրանց միջին գումարը կազմել է ընդամենը 27 դոլար, այնպես որ՝ ինքը պատասխանատու է ընտրողների առաջ, ոչ թե բանկերի:
Միաժամանակ Սանդերսն ասել է. «Ես նրան (Քլինթոնին) հարգում եմ, նա ինձ դուր է գալիս: Սա անհատների միջև պայքար չէ, մենք ի վերջո՝ հո հանրապետականներ չե՞նք»:
