Երևանի ավագանու Հանրապետական խմբակցության անդամ, Երևանի պատվավոր քաղաքացի Լևոն Իգիթյանն այսօր կրկին համոզմունք հայտնեց, որ Արամի 30 հասցեում գտնվող շենքը «սարայ» էր, ենթակա էր քանդման, պարզապես գիշերով քանդելու փոխարեն պետք էր ցերեկով քանդել։
Մինչդեռ Աֆրիկյանների տան դեպքում Հայաստանի «Գեղագիտության ազգային կենտրոնի» տնօրենն իր որակումներում ավելի զուսպ էր։ Իգիթյանը դեմ է միայն «Զվարթնոց» օդանավակայանի հին մասնաշենքի էստակադայի քանդմանը։ Նրա համար արժեքավոր են նորակառույցները, օպերայի ու կառավարության շենքերը, համալսարանի սև շենքը, Հյուսիսային պողոտայի առանձին շինություններ. «Դրանցում կուլտուրա կա»։
Այն, որ Արամի 30-ը և հարակից շինությունները պետք է քանդվեն, համակարծիք է նաև ավագանու Հանրապետական խմբակցության անդամ, կոմպոզիտոր Մարտին Վարդազարյանը։ Մաեստրոն պնդում է, որ եթե 1940-ականներին էլ մարդիկ նման աղմուկ բարձրացնեին, ակցիաներ անեին, մենք այժմ ժամանակակից քաղաք չէինք ունենա։
Արվեստագետները համոզված են՝ «Հին Երևան» ծրագրով Երևանի նախկին տեսքը կվերականգնվի, և քաղաքի պատմությունը չի մոռացվի։
Երևանի գլխավոր ճարտարապետ Տիգրան Բարսեղյանին բավարարում է միայն այն փաստը, որ Արամի 30-ի և իրացման ենթակա հարակից շինությունների տեղում ոչ մի շենք չի կառուցվելու։ Տարածքի հաշվին ընդլայնվելու է մայթեզրը, ավելանալու են կանաչ գոտիները։
Ի դեպ, քաղաքի գլխավոր ճարտարապետը նշեց, որ ծրագրով նախատեսված էր Արամի 30-ի տեղահանում, այլ ոչ թե քանդում։ Բայց շենքը գիշերով քանդվեց։
Ուշագրավ է, սակայն, որ բազմաթիվ այլ օրինակներով հայ հանրությունը համոզվել է, որ ճարտարապետների այս հավաստիացումները ընդամենը հավաստիացումներ են՝ մանավանդ որ գործարար Սամվել Մայրապետյանն արդեն իսկ որոշել է և չի թաքցնում, որ այդ տարածքում պատրաստվում է հյուրանոց կառուցել, և ընդամենը մի քանի դատական որոշման է սպասում։
