Ամերիկյան Hellfire հրթիռը սխալմամբ հասցվել է Կուբա 2014 թ., գրում է The Wall Street Journal-ը: Այն նախատեսվել է Եվրոպայում ՆԱՏՕ-ի զորավարժությունների համար, բայց անհասկանալի կերպով հայտնվել է ԱՄՆ-ի հարևան կղզում:
ԱՄՆ իշխանությունները մեկ տարի փորձում են Կուբայի ղեկավարությանը համոզել վերադարձնել հրթիռը, հայտնում է պարբերականը՝ հղում անելով իր աղբյուրներին: Ամերիկացի մասնագետները նաև հետաքննում են զենքի փոխադրման ճանապարհը: Վարկածներից են՝ հանցագործների կամ լրտեսների գործողությունները: Փորձագետները հակված են նրան, որ Կուբա հրթիռի չկանխամտածված փոխադրումը «մարդկային սխալների շարքի կամ բացասական հանգամանքների ընթացքի» հետևանք է եղել:
Ռեակտիվ զենքի հայտնաբերված նմուշը պայթուցիկ նյութեր չի պարունակել: Այդուհանդերձ, ԱՄՆ զինվորական պաշտոնյաները վախենում են, որ կուբացի մասնագետները բացահայտել են հրթիռի «միջուկը» և ծանոթացել են տվիչների համակարգին և թիրախի ընտրության համակարգին: Վաշինգտոնը մտավախություն ունի, որ Հավանան այդ տվյալները կփոխանցի Չինաստանին, Հյուսիսային Կորեային կամ Ռուսաստանին:
