Ստամբուլի հայկական «Ակօս» թերթի փոխանցմամբ՝ ընդդիմադիր «Ժողովրդա-հանրապետական» կուսակցության (ԺՀԿ)՝ մարդու իրավունքների հարցերով փոխնախագահ Սեզգին Թանրըքուլուն խորհրդարանի հանձնաժողովին ներկայացրել է օրինագիծ, որն առնչվում է Թուրքիայի քաղաքացիության մասին օրենքում փոփոխություններ կատարելուն։
Եթե ընդունվի Թանրըքուլուի ներկայացրած օրինագիծը, ապա վերջին 100 տարում արտաքսված ու քաղաքացիությունից զրկված հայերը, հույները, ասորիները, հրեաներն ու քրդերը կունենան Թուրքիայի քաղաքացիություն ստանալու իրավունք։ Օրինագծի համաձայն՝ նման իրավունքից կարող են օգտվել ինչպես բռնագաղթի ենթարկված անձինք, այնպես էլ նրանց ողջ չլինելու դեպքում՝ նրանց ժառանգները՝ մինչև 4-րդ սերունդ։
Քաղաքացիություն ստանալու համար դիմողներին անհրաժեշտ է ներկայացնել «տվյալ ժամանակվա անձնագրեր», եկեղեցական և կրոնական այլ հաստատությունների արձանագրություններ, փոքրամասնությունների հիմնադրամների կամ այլ կառույցների փաստաթղթեր, Օսմանյան կայսրության փաստաթղթեր, բռնագաղթից հետո հանգրվանած երկրների փաստաթղթեր և այլն։
Ընդգծվում է, որ խոսքը հիմնականում 1915-1980-ական թվականների դեպքերի մասին է, որոնք հանգեցրել են Թուրքիայից հարյուր հազարավոր հայերի, հույների, ասորիների ու հրեաների արտաքսմանը։ Դրանց թվում հիշատակված են 1915 թվականի տեղահանության մասին օրենքը, 1955 թվականի սեպտեմբերի 6-7-ին հայերի ու հույների ջարդերը, «Ունեցվածքի հարկը», «Հայրենակի՛ց, թուրքերեն խոսի՛ր» կամպանիան և այլն։
1980-ական թվականների հետ կապված՝ նշված է, որ Թուրքիայի արևելքում ու հարավ-արևելքում PKK-ի հետ անվտանգության ուժերի բախումների պատճառով, քաղաքական դրդապատճառներով, շատերը լքել են այդ տարածքները և զրկվել Թուրքիայի քաղաքացիությունից։ Հաղորդվում է, որ ԺՀԿ-ն նախկինում նույնպես ներկայացրել է նմանատիպ օրինագիծ, սակայն այն տապալվել է։
