Հայաստանի գործատուների միության նախագահ Գագիկ Մակարյանն այսօր լրագրողների հետ հանդիպմանը նշեց, որ աշխատավորության քանակը Հայաստանում խիստ նվազել է. եթե խորհրդային տարիներին մարդկանց մեծ մասն աշխատում էր, արդյունաբերությունը զարգանում էր, ապա այժմ արդյունաբերությունում աշխատողների թիվը չի գերազանցում 80 հազարը:
«Մենք լուրջ անելիքներ ունենք աշխատողների քանակը ավելացնելու հարցում: Մեզանում անցյալ տարիներին գործազրկությունը 18.4 տոկոս էր, կառավարությունը խոստացել էր նվազեցնել այդ թիվը, սակայն թիվն աճեց` հասնելով 19.7 տոկոսի»,- ասաց նա:
Բանախոսն ասաց, որ վերջին շրջանում իրենք ուսումնասիրում են փոքր բիզնեսին մտահոգող հարցերը: Գործազրկությունը վերացնելու համար անհրաժեշտ է փոքր բիզնեսին թողնել ազատ, թույլ տալ, որ «ազատ շնչի». «Մենք լուրջ մեսիջներ պիտի ուղարկենք կառավարությանը և օգնենք: Հաճախ նրանք էլ չգիտեն, թե որտեղից են այդ բացերը: Փոքր բիզնեսը ֆինանսավորման խնդիր ունի, վարկեր չի վերցնում, որովհետև տոկոսադրույքը բարձր է, և ամեն ամիս չէ, որ կարող է այդքան գումար մուծել, իսկ Կենտրոնական բանկը այդ բիզնեսը համարում է անվճարունակ և այլևս գումար չի տրամադրում: Խուսափելով գլխացավանքից` այդ մարդիկ վարկեր ուղղակի չեն վերցնում»:
Գործատուների միության նախագահը ընդգծեց, որ հարկային դաշտում ևս փոքր բիզնեսը գտնվում է անհավասար դաշտում՝ վճարում է նույն հարկերը, ինչ մեծերը: Հարկայինն էլ օգտվում է առիթից, ստուգումներ անցկացնում, ակտեր գրում, ինչը դառնում է ճակատագրական փոքր բիզնեսի համար:
Պրն Մակարյանն ասաց նաև, որ երկար տարիներ գործող փոքր բիզնեսներից շատերն այսօր փակվում են այն պատճառով, որ աղքատության պատճառով սպառող չունեն, կամ մարդիկ չկան՝ արտագաղթել են:
Լուսանկարը՝ PanARMENIAN Photo-ի
