ՀՀ առաջին նախագահի մամլո խոսնակ, ՀԱԿ կուսակցության վարչության անդամ Արման Մուսինյանը, ելույթ ունենալով Ազատության հրապարակում ՀԱԿ կուսակցության հանրահավաքին, նշեց, որ այսօր քաղաքական գործընթացների կենտրոնում Երևանի ավագանու ընտրություններն են:
Չնայած հետընտրական շրջանում հասարակության հիասթափությանը, նրա խոսքով,իրենք կրկին կարողացան ակտիվացնել հասարակությանը և կարողացան նրանց հասցնել ընտրությունների հսկայական կարևորությունը, մեծապես օգնել է նաև մտքից ու ասելիքից զուրկ ծաղիկ-փուչիկ քարոզչությամբ ընդդիմությունը՝ իր ասելիք չունեցող առաջնորդով:
Երկրորդ հանգամանքը, ըստ նրա, տոտալ ատելությունն է ՀՀԿ երևույթի նկատմամբ: Նա նշեց, որ ՀՀԿ-ի տեղական մարմինները չեն ընդդիմանում իրենց դեմ ուղղված քննադատություններին, ավելին, մասնավոր զրույցում իրենք են խոսում տեղի ունեցած և տեղի ունենալիք խախտումների մասին:
Հիմա, Արման Մուսինյանի խոսքով, իշխանություններին մի բան է մնացել՝ հնարավորինս կեղծել, գողանալ ժողովրդի ձայնը: Նա նշեց, որ մի քանի տասնյակ լրատվական կայքերով սուտ, կեղծ տեղեկություն են տարածում ՀԱԿ-ի մասին, ինչից կարելի է անել մի եզրակացություն՝ նրանք ուղղակի վախեցած են:
«Մենք՝ ի տարբերություն վարչախմբի, հողին կպած, իրական քաղաքական ուժ ենք: Ունեցել ենք ալեկոծություններ, կորուստներ և դրանով ենք ուժեղ: Վստահ եղեք, ՀՀԿ-ն իշխանությունից հեռանալու դեպքում ՀՀԿ-ից մնալու է Հ տառը, որովհետև այնտեղ են՝ փողի համար: Նրանք կլինեն ցանկացած կուսակցության անդամ, միայն թե փող աշխատեն»,-ասաց Արման Մուսինյանը՝ հավելելով, որ մայիսի 5-ին իրենք հաղթելու ռեալ շանս ունեն:
«Եթե կազմակերպենք գրագետ դիմադրություն, լարենք մեր ուժերը, ապա մայիսի 6-ին Երևանի քաղաքապետի աթոռին հայտնվելու է ոչ ՀՀԿ-ական: Դա լինելու է Վահագն Խաչատրյանը և այդ օրից սահուն հեղափոխություն է լինելու, Սերժ Սարգսյանի հեռացումը ժամանակի հարց է լինելու»,-եզրափակեց իր խոսքը Արման Մուսինյանը:
