Բոստոնի ահաբեկչության իրականացման մեջ կասկածվող Ցարնաև եղբայրները, ամենայն հավանականությամբ, գործել են միայնակ և առաջնորդվել կրոնական նկատառումներով՝ ենթադրում է Associated Press ամերիկյան գործակալությունը: Հայտնի է, որ վերջին տարիներին եղբայրները ակտիվորեն հետաքրքրվել են իսլամով:
Իր հերթին ABC հեռուստաալիքը նշում է, որ եղբայրները հավանաբար պայթուցիկներ պատրաստել սովորել են՝ կարդալով համացանցով հասանելի քայլերը:
Հայտնի են դարձել նոր փաստեր Թամերլան Ցարնաևի կյանքից: Բոստոնի իսլամական համայնքը հայտնում է, որ Թամերլանը Քեմբրիջի մզկիթում երկու անգամ խաթարել է քարոզը: Այնտեղ էր նա հաճախում ժամանակ առ ժամանակ:
Առաջին դեպքը տեղի է ունեցել 2012-ի նոյեմբերի 16-ին: Այդ ժամանակ Ցարնաևը վիճել է քարոզչի հետ, որը մուսուլմաններին խնդրել է ամերիկյան ազգային տոները՝ Անկախության և Գոհաբանության օրերը, նշել այնպես, ինչպես Մուհամմեդ մարգարեի ծննդյան օրը:
Երկրորդ դեպքը տեղի է ունեցել 2013-ի հունվարի 18-ին: Ցարնաևը երեսպաշտ է անվանել քարոզչին՝ հայտարարելով, որ սևամորթ ամերիկացիների քաղաքացիական իրավունքների մարտիկ Մարտին Լյութեր Քինգը մեծ մարդ էր: Մզկիթում գտնվողները սկսել են անմիջապես բղավել նրա վրա՝ պահանջելով հեռանալ: Նման դեպքերն այլևս չեն կրկնվել, թեև Ցարնաևը շարունակել է մզկիթ այցելել: Ջոհարին այնտեղ շատ հազվադեպ են տեսել:
