Minval.az-ի փոխանցմամբ՝ տնտեսական գիտությունների դոկտոր, Տնտեսական հետազոտությունների կենտրոնի ղեկավար Գուբադ Իբադօղլուն գրառում է կատարել Facebook-ի իր էջում, որում նշել է, որ Ադրբեջանում ամեն երեք անձանցից մեկը պարտավորություններ ունի բանկի առջև. «Եթե դուք պարտք չեք բանկին և ունեք թեկուզև մեկ մանաթ, ապա հարուստ եք երկրի բնակչության 38 տոկոսից»։
Կենտրոնացված վարկային գրանցամատյանի տվյալներով՝ այս տարվա առաջին 9 ամիսների արդյունքներով Ադրբեջանում (հոկտեմբերի 1-ի դրությամբ) երկրում բանկին պարտք եղողների թիվը կազմում է 2.505.575 մարդ, իսկ երաշխավորների թիվը՝ 1.184.202 մարդ։ Սա նշանակում է, որ բնակչության 38.5 տոկոսը կամ էլ 3.7 միլիոն մարդ ուղիղ կամ անուղղակի պարտք է 44 բանկի ու 41 ոչ բանկային, վարկային կազմակերպությունների։
Համեմատության համար ընդգծենք, որ վերջին 5 ամիսներին ուղիղ ձևով պարտք ունեցողների թիվն աճել է ավելի քան 90.000 մարդով, իսկ երաշխավորների թիվը՝ 70.000 մարդով։ Կենտրոնացված վարկային գրանցամատյանի այլ տվյալներով՝ վարկային տեղեկությունների ընդհանուր թիվը կազմում է ավելի քան 10.4 միլիոն։
Դա նշանակում է, որ միջին հաշվով մեկ պարտապանը պարտավորություններ ունի 4 բանկի առջև։ Դա էլ իր հերթին նշանակում է, որ մի բանկի հետ իրենց հաշիվներն ավարտել անկարող անձինք վարկ են վերցնում մեկ այլ բանկից՝ պարտավորությունը մարելու համար։ Դա վկայում է բանկերի ու վարկային կազմակերպությունների աշխատանքների սխալ կազմակերպման մասին»։
