Չնայած նրան, որ վարչապետի մակարդակով անընդհատ գյուղացիներին հորդորում են հանգիստ լինել, ոչ մի կգ խաղող վազին չի մնալու, գյուղացիները շարունակում են ահազանգել մթերումների գործընթացում խառնաշփոթը շարունակվում է: Խառնաշփոթի պատճառը, ըստ գյուղատնտեսության փոխնախար Գառնիկ Պետրոսյանի, երկուսն է: Առաջինն այն է, որ վերջին ութ ամիսների ընթացքում 42 տոկոսով նվազել է գինու արտահանումը, շուրջ 50 տոկոսով՝ կոնյակինը, և վերամշակող ընկերությունների մի մասի մոտ առաջացել է ֆինանսական միջոցների պակաս, բայց փոխնախարարի խոսքով՝ կառավարությունը գնացել է ընդառաջ, հնարավորություն տվել երկարաժամկետ վարկերից օգտվել 9,5 տոկոսով: Հաջորդ խնդիրը Գառնիկ Պետրոսյանի ներկայացմամբ այն է, որ այս տարի խաղողի աննախադեպ բերք կա:
Գյուղատնտեսության փոխնախարին հակադարձում է Ագրարագյուղացիական միավորման նախագահ Հրաչ Բերբերյանը. ըստ նրա՝ մթերման հետ կապված այս խնդիրները առաջացել են սխալ կառավարման հետևանքով: Ինչ վերաբերում է հիմնավորմանը, թե բերքն աննախադեպ է, սա էլ պատճառ չէ, անակնկալ էլ չէ, կանխատեսումներ եղել են հենց նախարարության կեղմից ևս, ուստի պետք է պատրաստվեին գործընթացներին:
Հրաչ Բերբերյանի դիտարկմամբ՝ մթերումների մասով վերամշակող ընկերությունները զավեշտալի քայլերի են դիմում, գյուղատնտեսության նախարարությունն էլ ազդելու լծակներ չունի: Փոխնախարարի կարծիքով էլ՝ տնտեսվարողների հետ հարաբերություններում վարչական լծակները գործի դնելը ճիշտ չէ, ազատ շուկայական հարաբերությունների կանոններով պետք է շարժվել:
Ագրարագյուղացիական միավորման նախագահը մեկ այլ մտավախություն ևս ունի. զոռով, դռնեդուռ ընկնելով մթերումները եթե անգամ ամբողջությամբ կատարվեն, գյուղացիներին վճարելու հարցն է կիսատ-պռատ լուծվում, գործարաններից շատերը տեղում չեն վճարում, խոստանում են բերքը մթերել, հետո վճարել:
