2012 թվականի դեկտեմբերի 31-ի դրությամբ Մարդու իրավունքների Եվրոպական դատարանում կա ընդդեմ Հայաստանի Հանրապետության 950 բողոք, որոնք դեռ ընթացքի մեջ են: Այս մասին «Առաջին լրատվական»-ի հետ զրույցում ասաց «Արնի քնսալթ» փաստաբանական գրասենյակի փոխտնօրեն, միջազգային իրավունքի մասնագետ Արա Ղազարյանը, ով նաև հավելեց, որ բողոքներն ամենատարբեր բնույթի են. «Ամենաշատը կալանքների հետ կապված խախտումներ են արձանագրվել, հետո գալիս է գույքային իրավունքների և արդար դատաքննության իրավունքները, գերակշռում է, իհարկե, կալանքը»:
Այդուհանդերձ Արա Ղազարյանը նշեց, որ դրական միտումներ շատ կան, կալանքի վերաբերյալ որոշ համակարգային խնդիրներ լուծվել են, և դիմումներն արդեն Եվրոպական դատարան չեն գնում. «Ամենակարևոր խնդիրն այն է, որպեսզի ամրագվի բարոյական վնասի դիմաց նյութական փոխհատուցման իրավունքը, որը Հայաստանում չկա, իսկ Եվրոպական դատարանը դա պահանջում է: Եվրոպական մարմինները Հայաստանից պահանջում են, որպեսզի դա օրենսդրությամբ ամրագրվի: Անցյալ տարի երկու վճիռ է կայացվել ընդդեմ Հայաստանի, որտեղ հստակ նշվում է նաև, որ Հայաստանում անձը հնարավորություն չունի անօրինականության, խոշտանգման դիմաց բարոյական վնասի փոխհատուցում հայցել: Հայաստանը պարտավորված է բարոյական վնասի ինստիտուտն ամրագրել առնվազն կյանքի իրավունքների դեպքում, խոշտանգումների դեպքում, անօրինական դատապարտվելու դեպքում, անօրինական ազատազրկելու դեպքում»:
Մեր այն հարցին, թե տարեցտարի ավելանու՞մ, թե պակասու՞մ են ՄԻԵԴ-ում ընդդեմ Հայաստանի Հանրապետության բողոքները, Ա. Ղազարյանը պատասխանեց. «Դժվարանում եմ ասել. միայն կասեմ, որ կտրուկ աճ չկա և չկա երկու պատճառով: Մեկն այն, որ որոշ խնդիրներ այստեղ տեղում լուծվում են, երկրորդ՝ որ Եվրադատարանը շատ ծանրաբերռնված է աշխատում, և շատ երկար է տևում մինչև վճիռը կայացվում է, իսկ եթե վճիռը նույնիսկ կայցվում է, ապա դրանց շատ մարգինալ մոտեցում է ցուցաբերվում:
5-6 տարի է տևում, մարդիկ ասում են՝ ավելի լավ է այստեղ կամ Վճռաբեկ դատարանի կամ Սահմանադրական դատարանի միջոցով փորձեմ լուծել, քան Եվրադատարանի:
Եվրոպական դատարանը շատ դեպքերում մարգինալ մոտեցում է ցուցաբերում, չի ցանկանում խնդիրը շատ խորությամբ ուսումնասիրել, քանի որ դա արդեն ուսումնասիրվել է ազգային դատարանների կողմից»։
