Մամուլում գրվել է արդեն, որ մարտի 19-ից ԲՀԿ առաջնորդ Գագիկ Ծառուկյանը, Աժ ՀՀԿ խմբակցության պատգամավոր Սամվել Ալեքսանյանն ու ռուսաստանաբնակ գործարար Սամվել Կարապետյանը Դուբայում հանգստանում էին: «Հրապարակին» հասած որոշ տեղեկություններով, սակայն, այդ հանգստին մասնակցել է նաև Սերժ Սարգսյանի հատուկ հանձնարարություններով դեսպան Արկադի Ղուկասյանը և ռուսաստանաբնակ մի քանի այլ հայ գործարարներ: Մի քանի օր տևած բանակցություններ-հանգստից հետո Արկադի Ղուկասյանն ու մյուսները վերադարձել են, իսկ Գագիկ Ծառուկյանն ու Սամվել Ալեքսանյանը, ինչպես արդեն հայտնի է, վերադարձել են ավելի ուշ՝ մարտի 31-ին: Քննարկված հարցերի շրջանակը, բնականաբար, գաղտնի է պահվում, սակայն, որոշ տեղեկություններով, առանցքային հարցերը եղել են Սերժ Սարգսյանի ինաուգուրացիայից հետո ձևավորվելիք ապագա կառավարության, կառավարության ղեկավարի, ինչպես նաև կադրային այլ հարցեր:
«Հրապարակի» տեղեկություններով, ինչ-որ ընդհանուր պայմանավորվածություններ, այնուամենայնիվ, ձեռք են բերվել, բայց թե կոնկրետ որ հարցերի շուրջ, հայտնի չէ:
Ուշագրավը «սխոդկայի» մասնակիցների ցանկն է. ըստ էության մասնակցել են տարածաշրջանում և Հայաստանում առկա բոլոր շահագրգիռ անձանց և ուժերի ներկայացուցիչները՝ Վլադիմիր Պուտինի, Սերժ Սարգսյանի և Ռոբերտ Քոչարյանի «դեսպանները»:
