Անգլիկան եկեղեցու բրիտանացի հոգևորական, Շոտլանդիայի Աբերդին քաղաքի Սուրբ Հովհաննես եկեղեցու առաջնորդը բացել է իր եկեղեցու դռները նաև տեղի մուսուլմանների առաջ, որպեսզի նրանք աղոթեն քրիստոնյաների հետ մեկտեղ:
Իսլամի հետևորդների համար Աբերդինում կա միայն մեկ մզկիթ, որը չի կարողանում տեղավորել բազմաթիվ այցելուներին, նրանց մի մասը ստիպված է լինում նամազ անել բաց երկնքի տակ: Այդ իսկ պատճառով Իսահակ Պուբալենն առաջարկել է ժամանակավորապես օգտագործել իր եկեղեցու շենքը:
Տեղի մզկիթի իմամը թեև նշել է, որ պատմության մեջ իրեն նման դեպքեր հայտնի չեն, սակայն ընդունել է հոգևորականի առաջարկը:
Ահմեդ Մագարբիի խոսքով՝ դա արտասովոր է, սակայն նման պրակտիկան կարող է օրինակ ծառայել երկրի այլ շրջանների եկեղեցիների համար:
Իսահակ Պուբալանը մանկությունն անցկացրել է Հնդկաստանում, որտեղ մեծացել է տարբեր կրոնական ուսմունքների միջավայրում: «Աշխարհիկ Հնդկաստանը սովորեցրել է ինձ յուրաքանյուր կրոնի վերաբերվել հավասար հարգանքով»,- հայտնել է նա The Times of India-ին տված հարցազրույցում:
