Armtimes.com-ի փոխանցմամբ՝ այսօր առավոտյան միջադեպ է տեղի ունեցել Հանրապետության հրապարակում՝ «Ոտքի Հայաստան» շարժման անդամների և Ոստիկանության միջև: Այս մասին տեղեկացանք շարժման նախաձեռնող խմբի անդամ Անդրեաս Ղուկասյանից:
Վերջինիս փոխանցմամբ՝ ոստիկանությունն այսօր հանել է իրենց կազմած կենդանի շղթան, և բողոքի ակցիայի մասնակիցներն էլ, տրամաբանության համաձայն, սկսել են պաստառները տեղափոխել Հանրապետության հրապարակի կենտրոն, ինչպես ի սկզբանե հայտարարված էր. «Առ այսօր, ինչպես տեսնում եք, ոստիկանությունը ֆիզիկապես թույլ չի տալիս այնտեղ նստացույց անցկացնել. կազմել է կենդանի շղթա, և երբ բողոքի ակցիայի մասնակիցներն անցնում են կենտրոն, իրենք դուրս են բերում նրանց: Սակայն ցուցարարները չեն ենթարկվում որևէ վարչական կամ քրեական պատասխանատվության այդ արարքի համար, ինչը վկայում է, որ քաղաքացիների՝ նստացույց իրականացնելու պահանջն օրինական է: Եվ երբ առավոտյան ոստիկանության շղթան հեռացավ, բնականաբար բողոքի ակցիայի մասնակիցները պաստառները վերցրին և սկսեցին տեղափոխել դեպի կենտրոն: Այդ պահին ոստիկանությունը նորից ի հայտ եկավ, միջամտեց, թույլ չտվեց, այնուհետև սկսեց արդարանալ, որ տեխնիկական խնդիր են ունեցել: Պարզապես փորձել են հերթափոխ իրականացրել, և մյուս շղթան այդ ընթացքում չէր հասցրել զբաղեցնել իր դիրքերը, և դա ոչ թե իրենց դիրքորոշման փոփոխության հետևանքն էր, որ ֆիզիկապես վերացավ պատնեշը, այլ պարզապես թերացում էր իրենց կողմից: Դրա համար մենք պաստառը նորից հետ բերեցինք, և ևս մեկ անգամ մատնացույց արեցինք ոստիկանությանը, որ ցանկացած պահի մենք անցնելու ենք դեպի կենտրոն և նստացույցը շարունակելու ենք այնտեղ, հենց որ իրենք այդ պատնեշը հեռացնեն»,- ասել է Ղուկասյանը:
