Որտեղ ԲՀԿ է, այնտեղ մեր կուսակցությունն անելիք չունի, որովհետև ԲՀԿ-ն իշխանության մասն է: «Առաջին լրատվական»-ի հետ զրույցում ասաց «Հայրենիք ու պատիվ» կուսակցության նախագահ Գառնիկ Մարգարյանը՝ անդրադառնալով գալիք ավագանու ընտրություններին:
Նա նշեց, որ անցյալ տարի նոյեմբեր ամսին իր ղեկավարած կուսակցության քաղխորհուրդը որոշում էր կայացրել, որ գործող ռեժիմի առկայության պարագայում որևիցե արդար ընտրության մասին անիմաստ է խոսել, որովհետև ինչ ուզում է՝ ռեժիմն անում է, ինչ թիվ ուզում է՝ նկարում է, ինչքան ուզում է՝ լցոնում է: Ըստ նրա՝ այստեղ խոսք պետք է գնա համակարգի փոփոխության մասին, որի վերաբերյալ իր ղեկավարած կուսակցությունը առաջարկություն էր արել:
«Գնացին, ի՞նչ ստացվեց՝ նորից լցոնումների, նորից ժողովրդին գնելու, նորից կեղծիքների արդյունքում նկարվեց այն, ինչ պետք էր իշխանությանը»,- ասաց Գառնիկ Մարգարյանը:
Վերջինս տեղեկացրեց, որ «Ժառանգություն» կուսակցության կողմից Երևանի ավագանու ընտրությունների ցուցակում ընդգրկվելու առաջարկ չի եղել, եթե լինի՝ կքննարկեն: Իսկ ինչ վերաբերում է միասնական ֆորմատներին, ապա Գառնիկ Մարգարյանն ընդգծեց. «Որտեղ ԲՀԿ է, այնտեղ մեր կուսակցությունն անելիք չունի, որովհետև ԲՀԿ-ն իշխանության մասն է»:
