Newsweek պարբերականն անդրադարձել է հայ ակտիվիստների բողոքի ցույցերին՝ ուղղված էլեկտրաէներգիայի սակագների պլանավորված բարձրացմանը։
«Խոսք տարածիր, լցրու փողոցներն ու մի՛ վճարի էլեկտրաէներգիայի վճարը,- կոչ է արել Երևանի Հանրապետության հրապարակում կազմակերպիչներից մեկը: «Եթե բոլորս չվճարենք էլեկտրաէներգիայի գումարը, նրանք չեն կարող որևէ բան անել»,- հավելել է նա։
40 տոկոսով գնի բարձրացումը, որը սկզբում պահանջում էր Հայաստանի էներգետիկ մենաշնորհատեր «Հայաստանի էլեկտրական ցանցերը», Հայաստանի էլեկտրականությունն ամենաթանկը կդարձներ նախկին բոլոր խորհրդային պետությունների շարքում։ Նույնիսկ 16 տոկոսի բարձրացումը, որն ի վերջո հավանության է արժանացվել կառավարության կողմից, զգալի բեռ է երկրի բնակչության մեծ մասին համար։ Ընդ որում՝ դա վերջին տարիների արդեն երրորդ բարձրացումն է։
Հայ ակտիվիստները բացահայտորեն ասել են, որ Հայաստանում տեղի ունեցողը Մայդանի հետ համեմատելը սխալ է։ «Դա էլեկտրաէներգիայի գնի բարձրացման դեմ է, այլ ոչ թե որևէ օտարերկրյա պետության»,- Twitter-ում գրել է հայ բլոգերներից մեկը։
Պարբերականը նշում է, որ էներգետիկ ոլորտի մասին բանակցություններ են անցկացվել Ռուսաստանի և Հայաստանի միջև, նշվում է նաև Սերժ Սարգսյանի և Ռուսաստանի բանակցությունների մասին՝ աուդիտ իրականացնելու «Հայաստանի էլեկտրական ցանցերում»։ Բանակցություններից բացի ոչ մի հիմնավոր պլան չի համաձայնեցվել իրավիճակի կարգավորման համար՝ եզրափակում է պարբերականը։
