Արմավիրի մարզի Ակնալիճ գյուղում հանրապետության եզդի համայնքը իր տաճարը կկառուցի, որի էսքիզն արդեն պատրաստ է։
Այս մասին «Առաջին լրատվականի» հետ զրույցում նշեց տաճարի ճարտարապետ Արտակ Ղուլյանը՝ հավելելով, որ աշխարհում եզդիները շատ քիչ նման տաճարներ ունեն, որոնք կոչվում են զիարաթ (սրբատեղի)։
«Եզդիների կրոնը կապված է շաբաթվա 7 օրերի թվով 7 հրեշտակների պաշտամունքի հետ, և կա գլխավոր հրեշտակ-հավքը՝ սիրամարգը, որը կարծես մեր «Հազարան բլբուլն» է։ Իրենք շատ ավանդապաշտ են, և իրենց կրոնը արևապաշտության, քրիստոնեության տարբեր հոսանքների խառնուրդ է»,- ընդգծեց Արտակ Ղուլյանը։
Նրա խոսքով՝ իր նախագծած զիարաթի նախնական էսքիզն արդեն պատրաստ է, որին իրենք համաձայնել են։ «Նրանք պնդեցին, որ դա հանկարծ չհիշեցնի եկեղեցի և նման չլինի հայկական քրիստոնեական տաճարներին։ Իրենց ճարտարապետական ավանդույթը շատ միօրինակ է ու խիստ։ Այդ խստությունը կապված է իրենց հավատալիքների թվային սիմվոլիկայի հետ։ Շատ հետաքրքիր է, որ թվային սիմվոլիկայի ավանդույթն իրենց մեջ կենդանի է։ Օրինակ՝ հայերիս մեջ այդ ավանդույթը ինտուիտիվ է, մենք ենթադրում ենք, որ երևի մեր նախնիները 12 թվի մեջ իմաստ են դրել, իսկ իրենք կոնկրետ ասում են, որ, օրինակ, իրենց գմբեթի 24 ճառագայթները խորհրդանշում են արևի օրվա ժամերը»,- նշեց ճարտարապետը։
Արտակ Ղուլյանն ասաց, որ սա երկրորդ կառույցն է եզդիների։ Առաջինը էլի կառուցվել է Ակնալճում՝ հայկական տուֆով, որը համեմատաբար փոքր կառույց է։ «Եզդիների համար տաճար նախագծելու համար ես համացանցի օգնությամբ ուսումնասիրել եմ եզդիների ազգային, կրոնական սովորույթները։ Վերջերս Թբիլիսիում էլ մի նոր զիարաթ է կառուցվել»,- ասաց Ղուլյանը։
Ճարտարապետը պատմեց, որ սկզբում ինքն այլ բան է առաջարկել, սակայն եզդիները պնդել են, որ առավելագույնս պահպանվեն իրենց պաշտամունքային ավանդույթները, շատ չհեռանան իրենց պատկերացրած տաճարից։
«Որքան հասկացա, ինչ-որ մեկը էսքիզի նկարը տեղադրել էր, իրենց մոտ քննարկում էր եղել, և դժգոհություններ են եղել, ինչպես հայերիս մոտ է լինում։ Մի խոսքով՝ քննադատություն է եղել, սակայն, ի վերջո, համաձայնությունը կայացել է։
