Ադրբեջանական Yeni Müsavat թերթի փոխանցմամբ՝ Ադրբեջանի պաշտպանության նախարարությունն իտալական ընկերությունից գնել է DaVinçi լրտեսական ծրագիր։ Ավելի վաղ միջազգային մամուլը հայտնել էր, որ ցանցահեններին հաջողվել է տիրել իտալական Hacking Team ընկերության ողջ տեղեկատվական բազային, որը մասնագիտացած է Իտալիայի անվտանգության մարմինների համար լրտեսական ծրագրերի պատրաստման մեջ։
WikiLeaks-ի նյութերից հայտնի է դարձել, որ այդ ընկերությունն Ադրբեջանին վաճառել է հեռակառավարման լրտեսման համակարգ, այսպես կոչված՝ DaVinçi կամ Galileo։ Ենթադրվում էր, որ այդ համակարգն իտալական ընկերությունից գնել է Ադրբեջանի ազգային անվտանգության նախարարությունը, սակայն բառացիորեն օրեր առաջ ցանցահենները համացանցում տեղադրեցին Hacking Team ընկերության ողջ տեղեկատվական բազան և այդպիսով հայտնի դարձավ, որ DaVinçi ծրագիրն իտալական ընկերությունից գնել է Ադրբեջանի պաշտպանության նախարարությունը։
Ադրբեջանի ՊՆ-ն այն գնել է ոչ թե ուղիղ ձևով, այլ միջնորդավորված։ Ծրագիրն իտալացիներից գնել է ԱՄՆ-ում գրանցված մի ընկերություն։ Hacking Team-ի ներքին փաստաթղթերի համաձայն՝ Ադրբեջանի ՊՆ-ն 2013 թվականին ԱՄՆ-ում գտնվող Horizon Global Group ընկերության միջոցով 320.000 եվրոյով գնել է «Հեռվից վերահսկման համակարգ» (RCS) լրտեսական ծրագիրը։
Ծրագրի սպասարկման համար առանձին փոխանցվել է 16.000 եվրո, ինչը նույնպես Ադրբեջանի ՊՆ-ն իրականացրել է Horizon Global Group ընկերության միջնորդությամբ։ Գումարն իտալացիներին վճարվել է 2014 և 2015 թվականներին։ Ընդգծվում է, որ Hacking Team-ի մշակած լրտեսական ծրագրերը նախատեսված են համակարգիչների ու սմարթֆոնների վրա գաղտնի հարձակում գործելու համար։ Լրտեսական այդ ծրագրերը կարող են պատճենել Windows, OS X կամ Linux օպերացիոն համակարգերով գործող համակարգիչներում եղած ողջ տեղեկատվությունը։
Բացի դրանից՝ դրանք կարող են պատճենել Android, iOS, Blackberry ու Windows Phone հարթակներով գործող սմարթֆոնների ամբողջ տեղեկատվությունը։ Այդ ծրագիրը ձայնագրում է Skype-ով, Facebook-ում, Twitter-ում, WhatsApp-ում, Line-ով, Viber-ով բոլոր խոսակցությունները։ Ծրագիրն առանց տիրոջ իրազեկվածության միացնում է սմարթֆոնի տեսախցիկն ու բարձրախոսը, ինչպես նաև ցույց է տալիս գաջետի տիրոջ գտնվելու վայրը։ Հաղորդվում է, որ լրտեսական այդ ծրագրերի միջոցով Ադրբեջանի ՊՆ-ն կարող է իրականացնել էլեկտրոնային հետախուզություն։
