Ռուսական Vedomosti թերթին տված հարցազրույցի ժամանակ ԵԱՀԿ Մինսկի խմբի ամերիկացի համանախագահ Ջեյմս Ուորլիքը պատասխանել է ոչ վաղ անցյալում Ադրբեջանի՝ Ռուսաստանից ու Իսրայելից զենքի խոշոր խմբաքանակներ գնելու մասին հարցին։
«Երկու կողմն էլ՝ թե՛ Հայաստանը, թե՛ Ադրբեջանը, իրավասու են ապահովել իրենց անվտանգությունը, և դրա հետ կապված՝ մենք հասկանում ենք, որ նրանք կարիք ունեն ու ձգտում են սպառազինություն գնել տարբեր մատակարարներից։ Միևնույն ժամանակ մտահոգություն է հարուցում ռազմականացման ուժգնացումը՝ հատկապես շփման գծի երկայնքով, ինչպես նաև հայ-ադրբեջանական սահմանին։
Խնդիրը ոչ թե զենքի քանակն է, այլ դրա վերափոխումը։ Գոյություն ունի սխալ հաշվարկի վտանգ, և դա հարուցում է մտահոգություն։ Մենք զբաղվում ենք այդ հարցերով։ Եթե նախկինում հրադադարի ռեժիմը խախտվել է դիպուկահար հրացանների ու հրաձգային զենքի օգտագործմամբ, ապա ներկայումս այնտեղ կա ավելի խոշոր սպառազինություն։ Դա նույնպես մտահոգում է մեզ։ Մեզ նաև մտահոգում է ռազմական հավասարակշռության հարցը։
Ինչպես նախկինում, բախումներ են գրանցվում երկու երկրների միջև։ Այդ պատճառով էլ մենք չենք ցանկանում, որ ռազմական ուժի հարաբերակցությունը խթանի մեկ կամ մյուս կողմին՝ օգտագործելու որոշակի առավելություններ։ Նույն այդ պատճառով Հայաստանը պետք է մասնակցի կարգավորման գործընթացին։ Այդպիսով ողջ վտանգավոր ռազմական իրավիճակը կլինի վերահսկողության տակ»։
Ուորլիքը ԼՂ-ի շուրջ ընկած տարածքների հարցում Վաշինգտոնի դիրքորոշմանն առնչվող հարցին ի պատասխան՝ ասել է. «Օկուպացված տարածքները կարգավորման համալիր շրջանակներում պետք է վերադարձվեն Ադրբեջանի վերահսկողության տակ։ Այստեղ կարևոր է չկառչել մեկ տարրից կամ կարգավորման մեկ սկզբունքից։
Տարածքները պետք է վերադարձվեն, սակայն կան նաև այլ գործոններ։ Եվ հենց դրա համար էլ մենք մշտապես խոսում ենք համալիր կարգավորման մասին. դուք չեք կարող վերցնել միայն մեկ ասպեկտ և պնդել, որ դա կարգավորման հիմքն է։ Մենք պետք է խաղաղ կարգավորումը դիտարկենք ամբողջությամբ»։
Հարցին՝ ինչպե՞ս է ԵԱՀԿ Մինսկի խումբը տեսնում հայկական կողմի այն մտահոգության կարգավորումը, որ եթե ԼՂ-ի շուրջ ընկած տարածքները վերադարձվեն Ադրբեջանին, ապա ադրբեջանական բանակն այնտեղից կարող է կրակել ԼՂ-ի վրա, Ուորլիքը պատասխանել է. «Կարգավորման տարրերի թվում պետք է լինեն անվտանգության երաշխիքները, որոնք իրենցում ներառում են միջազգային խաղաղապահ ուժեր։
Եթե կամ երբ տարածքները վերադարձվեն, ապա անհրաժեշտ կլինի մտցնել միջազգային խաղաղապահ ուժեր՝ ապահովելու համար ԼՂ-ի անվտանգությունը»։
Հաջորդող հարցին՝ ո՞ւմ խաղաղապահների մասին է խոսքը՝ ԵԱՀԿ-ի՞, թե՞ ՄԱԿ-ի, Ուորլիքը պատասխանել է՝ դա պետք է լինի քննարկման առարկա, և պետք է որոշեն կողմերը։
