Արտաշատի քաղաքապետի թեկնածու Հովհաննես Ղազարյանը՝ Գազի Հովոն, այսօր քաղաքապետի թեկնածությունից հրաժարվելու դիմում է գրել՝ «ճանապարհն» ամբողջությամբ զիջելով նախկին հակառակորդի որդուն՝ Արգամ Աբրահամյանին: Մինչ Հովհաննես Ղազարյանը կհիմնավորի, թե ինչու է լքել ընտրապայքարը, Արտաշատում արդեն տեղեկություններ են տարածել, որ մրցակցի վարչապետ հայրիկը Հովհաննես Ղազարյանին ընտրապայքարից դուրս գալու դիմաց յուղոտ գործ է խոստացել:
«Առաջին լրատվական»-ի հարցին՝ ինչո՞ւ թեկնածությունից հրաժարվեց, ճնշե՞լ են, թե՞ լավ աշխատանք խոստացել, Հովհաննես Ղազարյանը պատասխանեց. «Եթե կլսեք մի օր, որ Ղազարյան Հովհաննեսը աշխատում է… սա՝ մեկ, ճնշումներ էլ իմ վրա ոչ նախկինում, ոչ էլ հիմա ոչ մեկը չի կարողացել անել, որ ուզենան էլ՝ չեն կարա, մենք նորմալ հարաբերությունների մեջ ենք, սիրելիս: Դուք ուզում եք սրացում տաք»,- սրամտեց մեր զրուցակիցը:
Մեր հիշեցմանը՝ սկանդալային պատմություններն են վկայում նախկինում ձեր՝ հակառակորդներ լինելու մասին, հակադարձեց. «Պետություններն էլ են կռվում ու բարիշում, մենք չորս տարի առաջ հաշտվել ենք, հիմա իրավունք չունեի՞նք հաշտվելու, մինչև վերջ իրար կոտորեինք, որ ձեր սիրտը հովանա՞ր»,- վրդովվեց Գազի Հովոն:
Դիտարկմանը՝ այդ դեպքում ինչու առաջադրվեց, ապա հրաժարվեց թեկնածությունից, մեր զրուցակիցը հավելեց. «Այ քեզ բան, տենց էր պետք»:
