Գերմանիայի դաշնային հետախուզական ծառայության (Bundesnachrichtendienst՝ BND) ղեկավար Գերհարդ Շինդլերը խոստովանել է, որ իր գերատեսչությունը մի շարք սխալներ է թույլ տվել ԱՄՆ Ազգային անվտանգության գործակալության (ԱԱԳ) հետ համագործակցության ժամանակ: Associated Press-ի հաղորդմամբ՝ նա պատճառներից մեկը համարել է գերմանական հետախուզության կախվածությունն ամերիկյան հատուկ ծառայություններից:
Խորհրդարանում լսումների ժամանակ իր ելույթի ընթացքում Շինդլերը հայտարարել է, որ BND-ն մի քանի տարվա ընթացքում ինչպես հարկն է չի ստուգել գաղտնալսման օբյեկտների ցուցակները, որոնք ներկայացրել է ԱԱԳ-ն: Նրա խոսքով՝ գերմանական գերատեսչության մի շարք աշխատակիցներ ամերիկյան հետախուզության կասկածելի նպատակների մասին իմացել են դեռևս 2005թ., սակայն իրեն այդ մասին տեղեկացվել է միայն 2015թ. մարտին՝ պաշտոնի անցնելուց 3 տարի հետո:
Նա այդ բացթողումն անվանել է «զարմանալի»՝ նշելով, որ տվյալ փաստի մասին լռեցնել կարող էր ստիպել ամերիկյան հետախուզական ծառայությունից Գերմանիայի հետախուզության կախվածությունը: Շինդլերը խոստացել է մանրամասն հետաքննություն կատարել գերատեսչությունում:
Գերմանիայում հերթական լրտեսական սկանդալը բռնկվել է ապրիլի կեսին, երբ Spiegel Online առցանց պարբերականը հայտնել է, որ ԱՄՆ ԱԱԳ-ն ավելի քան 10 տարի հետևել է եվրոպացի քաղաքական գործիչներին, պաշտոնյաներին ու ձեռնարկատերերին՝ օգտագործելով գերմանական հետախուզական ծառայության տեխնիկական հնարավորությունները: Լրտեսությունն արվել է առանց Գերմանիայի Դաշնային հետախուզական ծառայության իմացության:
2013թ. հոկտեմբերին ամերիկյան հատուկ ծառայությունների նախկին աշխատակից Էդվարդ Սնոուդենի բացահայտումներից հետո հայտնի դարձավ, որ ԱԱԳ-ն և ԿՀՎ-ն աշխատել են Գերմանիայի տարածքում, մասնավորապես՝ գաղտնալսել են Գերմանիայի կանցլեր Անգելա Մերկելի հեռախոսը:
