Երևանի քաղաքապետարանի աշխատակազմի բնապահպանության վարչության գլխավոր էկոլոգ Դիանա Գրիգորյանը մասնագիտորեն հիմնավորված է գնահատում այս օրերին Երևանում իրականացվող ծառերի խորը էտը:
«Այս տարվա գարնանանային էտումները, ինչպես նաև նախորդ տարիների էտումները, իրականացվում են ագրոկանոնների համաձայն, ինչի վերաբերյալ առկա է մասնիագիտական եզրակացություն: Այս մասին հանրությանը իրազեկելու նպատակով պատրաստվել է նաև տեսանյութ, որտեղ թեղի ծառատեսակի խորը էտի վերաբերյալ դրական կարծիք են հայտնում բուսաբանության ինստիտուտի տնօրեն՝ Ժիրայր Վարդանյանը, Ագրարային համալսարանի անտառագիտության ամբիոնի դասախոսները, «Հանուն կայուն մարդկային զարգացման ասոցիացիայի» նախագահ՝ Կարինե Դանիելյանը։
Տեղեկացնեմ նաև, որ թեղիների խորը էտը թեղու տերևակերի և ցողունային վնասատուների դեմ միակ արդյունավետ պայքարի ձևն է, քանի որ թունաքիմիկատներով բուժումը ոչ միայն աղտոտում է շրջակա միջավայրը, այլ նաև տվյալ վնասատուների դեմ արդյունավետ չէ։
Ընդ որում, նշված վնասատուները սեզոնի ընթացքում ոչնչացնում են ոչ միայն ծառի տերևային զանգվածը, այլև նպաստում են ծառերի աճի և զարգացման, նաև դեկորատիվ տեսքի կտրուկ անկմանը, երբեմն նույնիսկ ծառի մահվանը։
Միևնույն ժամանակ, նշված միջոցառումները խիստ ողջունելի են Երևանի բնակիչների կողմից, քանի որ յուրաքանչյուր սեզոնին բազմաթիվ բողոքներ ենք ստանում մեր համաքաղաքացիներից, որոնց անհարմարություն են պատճառում վերը նշված վնասատուները»։
