«Քաղաքական դաշտը լուրջ վերադասավորումների շեմին է, որի սկիզբը դրվեց մարտի 17-ի հանրահավաքում: Արդյունքում պարզվեց, որ ԵԱՀԿ ներկայացուցիչ Պրեսկոտի միջամտությամբ երկխոսություն է սկսվել Լևոն Տեր-Պետրոսյանի և Սերժ Սարգսյանի միջև:
Իսկ պայմանավորվածությունը Լևոն Տեր-Պետրոսյանի առաջ քաշած երեք պայմաններն են` Ազատության հրապարակի ազատում, քաղբանտարկյալների ազատարձակում և Մարտի 1-ի զոհերի սպանությունների բացահայտում»,- այս մասին այսօր հրավիրված ասուլիսի ընթացքում հայտարարեց «Ժառանգություն» կուսակցության վարչության փոխնախագահ Ռուբեն Հակոբյանը:
Նրա խոսքերով, այդ պահանջները մասամբ կատարվել են: Րաֆֆի Հովհաննիսյանը ցույց տվեց, որ անկաշկանդ հնարավոր է մտնել Ազատության հրապարակ: Քաղբանտարկյալները ազատ են արձակվում, և, Աստված տա, բոլորն էլ ազատվեն։ Իսկ Մարտի 1-ի դեպքերի բացահայտման հետ կապված՝ Ռ. Հակոբյանը նշեց, որ իշխանությունները երբեք էլ չեն ասել, թե չեն բացահայտի, հետևաբար, «Ժառանգության» փոխնախագահի կարծիքով, Մարտի 1-ի զարգացումները մասամբ կբացահայտվեն, և պատասխանատվության կենթարկվեն ներքին գործերի միջին խավի պաշտոնյաներ ու գործարարներ, ուժայիններ, ինչի արդյունքում պատասխանատվությունից որոշ չափով կխուսափեն թե՛ Սերժ Սարգսյանը, թե՛ Լևոն Տեր-Պետրոսյանը:
Ի դեպ, Ռուբեն Հակոբյանը առաջարկեց, որ Լևոն Տեր-Պետրոսյանը հրապարակայնորեն ներողություն խնդրի Արթուր Բաղդասարյանից՝ պարզաբանելով, որ եթե Արթուր Բաղդասարյանը հենց սկզբից գնաց իշխանության հետ համագործակցության, ապա Լևոն Տեր-Պետրոսյանը գնաց այդ քայլին 3 տարի անց և 10 զոհերից հետո: Հակոբյանը մեկ անգամ էլ հիշեցրեց այն նշաձողը, որ վերցրել էր Տեր-Պետրոսյանը՝ իշխանությանը տականք և սրիկա չհամարելու համար մյուս ընդդիմադիր ուժերին անվանելով աղբ և դհոլ, ու նշեց, որ այսօր հենց ինքն է հետ կանգնում իր նշաձողից: