Կոտայքի մարզի ընդհանուր իրավասության դատարանում Վաղինակ Մկրտչյանի նախագահությամբ ավարտվել է Արմեն Գոգոլյանի գործի դատական քննությունը:
Ըստ մեղադրանքի՝ զինծառայող, 20-ամյա Արմեն Գոգոլյանը, ծառայելով որպես կապի հանգույցի ավագ ռադիոհեռախոսավար, ծառայության ժամանակ հեռախոսով ծանոթացել է Կոտայքի մարզի բնակչուհի Զ.-ի հետ:
2014 թվականի հունիսի 25-ից սկսած՝ Գոգոլյանը աղջկանից պարբերաբար պահանջել է 30 հազար դրամ: Նա սպառնացել է, որ եթե պահանջած գումարն աղջիկը մինչև հուլիսի 12-ը չտա, ինքը նրան արատավորող լուսանկարներ կտեղադրի համացանցում և այդ լուսանկարները փոստով կուղարկի նաև նրա ծնողներին:
Արմեն Գոգոլյանը մեղադրվում էր շորթում կատարելու համար՝ ՀՀ քրեական օրենսգրքի 182 հոդվածի 1-ին մասով:
Դատարանում Գոգոլյանն իրեն մեղավոր է ճանաչել: Գործը քննվել է արագացված կարգով:
Տուժողի հայրը դատարանին տեղեկացրել է, որ դուստրն ամուսնացել է, մեկնել է Ռուսաստան:
Դատարանը հաշվի է առել, որ ամբաստանյալը ծնկահոդի հետ կապված առողջական խնդիրներ ունի:
Աղջկանից գումար պահանջող երիտասարդին դատարանը մեղավոր է ճանաչել ու պատժել տուգանքի ձևով:
Արմեն Գոգոլյանը դատապարտվել է 400 հազար դրամ տուգանքի: