Ռուս սպանված ընդդիմադիր գործիչ Բորիս Նեմցովը խոստացել էր ապացույցներ հրապարակել Դոնբասի հակամարտությանը ռուսական զինված ուժերի մասնակցության մասին: Այս մասին հաղորդում է «Ուկրինֆորմ»-ը՝ վկայակոչելով Վիննիցա ժամանած Ուկրաինայի նախագահ Պյոտր Պորոշենկոյի հայտարարությունը:
«Մի քանի շաբաթ առաջ մենք զրուցում էինք այն մասին, թե ինչպես կառուցենք Ուկրաինայի և Ռուսաստանի միջև հարաբերությունները: Այն կերպ, ինչպես որ մենք կցանկանայինք դրանք տեսնել: Բորիսը հայտարարեց, որ պետք է համոզիչ ապացույցներ հրապարակի Ուկրաինայում ռուսական զինված ուժերի մասնակցության վերաբերյալ: Ինչ-որ մեկը դրանից շատ վախեցավ: Բորիսը չվախեցավ, դահիճները վախեցան: Նրանք նրան սպանեցին»,- ասել է Ուկրաինայի նախագահը:
Նրա խոսքերով՝ «Նեմցովն Ուկրաինայի մեծ ընկերն էր և մեծ հայրենասեր, մարդ, ով ինչպես կամուրջ՝ կապում էր մեր պետությունները, Ուկրաինայի և Ռուսաստանի միջև կառուցում էր այնպիսի հարաբերություններ, ինչպիսիք կցանկանային տեսնել ուկրաինացիները»:
«Մարտի մեկին նա պետք է դուրս գար երթի՝ բազմահազարանոց ցույցի գլխավորությամբ, ցույց տալու համար, որ կա այլ Ռուսաստան, որը սիրում է Ուկրաինան, հարգում մարդու իրավունքները, որի համար ազատությունը դատարկ խոսք չէ: Եվ հանուն ազատության և ժողովրդավարության նա պատրաստ էր իր կյանքը տալ»,- հավելել է Պորոշենկոն:
