Քաղաքական և ընտրական տեխնոլոգիաների փորձագետ Արմեն Բադալյանի կարծիքով՝ «Բարգավաճ Հայաստան» կուսակցության անդամները այս օրերին բավականաչափ սխալներ թույլ տվեցին՝ կապված ուժային կառույցերի կողմից կուսակցության նկատմամբ իրականացվող քաղաքականության հետ: Նման տեսակետ Բադալյանը հայտնեց «Առաջին լրատվական»-ի հետ զրույցում՝ անդրադառնալով ԲՀԿ առաջնորդ Գագիկ Ծառուկյանի հայտարարությանն ու փետրվարի 20-ի հանրահավաքը չեղյալ հայտարարելու որոշմանը:
«ԲՀԿ-ն չկարողացավ համարժեք և ադեկվատ քաղաքականություն իրականացնել այդ բռնաճնշումների նկատմամբ: ԲՀԿ-ի դիմադրողականությունը բավականին թույլ է:
Ինչ վերաբերում է հանրահավաքից հետ կանգնելու որոշմանը, ապա դա ճիշտ և տրամաբանական որոշում էր. Քաղաքապետարանը, բերելով իր փաստարկը, մերժել էր այդ հանրահավաքի անցկացումը: Եթե որևէ ուժ համարում է, որ քաղաքապետարանը գերազանցել է իր լիազորությունները այսպիսի որոշում ընդունելով, ապա այդ հարցերը լուծվում են վարչական դատարանի միջոցով: Եթե փետրվարի 20-ի հանրահավաքը մերժվում է, իսկ դու ուզում ես անպայման հանրահավաք իրականացնել, ապա դու խաղում ես իշխանությունների սցենարով»,- ընդգծեց մեր զրուցակիցը:
Նրա խոսքով՝ ոստիկանությունը կարող է շրջապատել Ազատության հրապարակը և թույլ չտալ այնտեղ անցկացնել համապատասխան միջոցառում, և եթե փորձեն ուժով մտնել հրապարակ, ապա ոստիկանությունը իրավունք կունենար օրինախախտ ցուցարարների նկատմամբ ուժ կիրառել:
«Այսինքն՝ տվյալ դեպքում կշահի իշխանությունը: Եթե անգամ ոստիկանությունը չցանկանա ուժ կիրառել և բացի հրապարակը, ապա նորից իշխանությունը կշահի, որովհետև ցույց կտա, որ ինքը մեծահոգություն է դրսևորել:
Հայաստանում ամեն գնով հանրահավաք անելու գաղափարը բխում է իշխանությունների ծրագրից: Հաշվի առնելով նաև այս հանգամանքը՝ գուցե ԲՀԿ-ն նպատակահարմար համարեց հրաժարվել այս հանրահավաքից, ինչը, իմ կարծիքով, տրամաբանական է»,- ասաց նա:
Բադալյանն ավելացրեց՝ այստեղ Ստալինգրադի ճակատամարտ էր, որ դուք անպայման այս շենքը պետք է պահպանեք, որպեսզի թշնամին չհասնի քո թիկունքը: «Խնդիրը նահանջելու կամ հարձակվելու մեջ չէ, խնդիրն այն է, որ երբ պետք է հարձակվել՝ պետք է հարձակվել, իսկ երբ պետք է նահանջել, ուրեմն պետք է նահանջել: Խնդիրը դա է:
Ինչ վերաբերում է հայտարարությանը, ապա հայտարարության մեջ նշվում է ցանկությունը՝ խաղաղ գործունեություն իրականացնելու, իշխանությունների հետ հարաբերությունները չսրելու մասին: Այսինքն՝ դա ընդամենը հայտարարություն էր՝ ուղղված իշխանություններին, որովհետև նաև զգուշացում կար. եթե իշխանությունները չափն անցնեն, ապա իրենք նույնպես, հնարավոր է, պատասխանեն, ինչը հաստատ չի բխում առաջին հերթին ժողովրդի շահից»,- նշեց նա:
