Թուրքական Today’s Zaman թերթը գրում է, թե ակնկալվում է, որ Աբխազիայի նախագահ Սերգեյ Բաղապշն ապրիլի 7-ին կայցելի Թուրքիա: Բաղապշին Թուրքիա այցելելու հրավեր են ուղարկել Աբխազական ասոցիացիաների դաշնությունը (ABHAZFED) և Կովկասան ասոցիացիաների դաշնությունը (KAFFED):
Պլանավորված է, որ ապրիլի 7-8-ը Սերգեյ Բաղապշը գտնվելու է Անկարայում, իսկ ապիլի 9-10-ը` Ադաբազարում և Ստամբուլում:
Իր թուրքական այցի կապակցությամբ Բաղապշը հայտարարել է. «Ես երբեք չեմ եղել Թուրքիայում, ուր ապրում են մեր բազում հայրենակիցները: Դա սխալ է, որ վերջին 5 տարիների ընթացքում Աբխազիայի նախագահը չի այցելել Թուրքիա և չի հանդիպել տեղի աբխազական համայնքի հետ:
Աբխազիան և Թուրքիան պետք է սկսեն բարիդրացիական հարաբերությունների հաստատումից: Երկկողմանի հարաբերությունները կարող են սկսվել տնտեսական կապերից և փոխադարձ այցերի վերականգնումից: Մենք պետք է տրանսպորտային ենթակառուցվածքներ ստեղծենք Աբխազիայի և Թուրքիայի միջև»:
Հիշեցնենք, որ 2009 թվականի սեպտեմբերի 10-ին Աբխազիա այցելեց Թուրքիայի արտգործնախարարի խորհրդատուի տեղակալ Ունալ Չևիքյոզը (այժմ՝ Մեծ Բրիտանիայում Թուրքիայի դեսպան), որը հանդիպեց Աբխազիայի արտգործնախարար Սերգեյ Շամբայի հետ: Դրանով Չևիքյոզը դարձավ վրաց-աբխազական պատերազմից հետո Աբխազիա այցելած առաջին արևմտյան դիվանագետը (ի դեպ, Թուրքիայի վարչապետ, ապա նաև նախագահ Սուլեյման Դեմիրելն առաջին օտարերկրյա հյուրն է, որն այցելել է Վրաստան (1992-ի հունիսին) ):
Չևիքյոզի այցից հետո`2009 թվականի դեկտեմբերին, հայտնի դարձավ, որ Աբխազիայի նախագահ Սերգեյ Բաղապշը պատրաստվում է ոչ պաշտոնական այց կատարել Թուրքիա: Այդ այցի շրջանակներում նախատեսվում էին հանդիպումներ Թուրքիայի աբխազական ազդեցիկ համայնքի և թուրք բարձրաստիճան պաշտոնյաների հետ: Չնայած այդ այցի ոչ պաշտոնական բնույթին` Վրաստանի իշխանությունները մեծ հիստերիա բարձրացրին և Թբիլիսիում գտնվող թուրք դեսպանին կանչեցին պարզաբանումներ տալու:
Թուրքիան բազմիցս շեշտել է, որ կողմ է Վրաստանի տարածքային ամբողջականությանը, ինչի պատճառով էլ արգելք է դրել Աբխազիայի հետ առևտրատնտեսական պաշտոնական հարաբերությունների վրա: Չնայած դրան`ներկայումս Թուրքիան տարեկան 100 միլիոն դոլարի ապրանք է արտահանում Աբխազիա:
Վրացական օրենքների համաձայն` Աբխազիայի ծովափն ու նավահանգիստները հայտարարվել են միջազգային նավարկության համար փակ գոտի: 1982-ին ՄԱԿ-ի ընդունած Ծովային իրավունքի կոնվենցիայի համաձայն, յուրաքանչյուր պետություն իրավունք ունի իր տարածքային ջրերը սահմանել 12 ծովային մղոնը չգերազանցող հեռավորության վրա: Միջազգային հանրությունը, որը չի ճանաչում Աբխազիայի ինքնիշխանությունը, նրա առափնյա 12-մղոնանոց գոտին համարում է վրացական տարածքային ջրեր:
Այդ պատճառով էլ Վրաստանը բազմիցս կալանել է Թուրքիայից Աբխազիա մեկնող առևտրանավերը: Վրաստանի կողմից թուրքական նավերի կալանման գործընթացն սկսվել է 1995 թվականից և շարունակվում է ավելի քան 15 տարի: Միայն 2009 թվականի առաջին 8 ամիսների ընթացքում Վրաստանը կալանել է Աբխազիա ուղևորվող 23 նավ, որոնցից 4-ը` «օկուպացված տարածքների ջրեր մուտք գործելու կանոնները խախտելու» մեղադրանքով: Այդ նավերի մեծ մասը բաժին է ընկել Թուրքիային։
Այդ 15 տարիների ընթացքում Վրաստանի իշխանությունները կալանել են շուրջ 100 թուրքական նավ, որոնք սովորաբար հետ չեն վերադարձվել թուրքական կողմին ու հանվել են աճուրդի: Միևնույն ժամանակահատվածում թուրքական կողմը կալանված նավերի ու ձերբակալված անձնակազմերի ազատ արձակման համար վրացական կողմին վճարել է 100 միլիոն դոլարի տուգանք:
