Լիբանանում սկսել է ձևավորվել ԴԱԻՇ («Իրաքի և Շամի իսլամական պետություն») ահաբեկչական խմբավորման բջիջ: Այս մասին հայտնում է The Times թերթը:
Թերթի հաղորդմամբ՝ ԴԱԻՇ-ը «Լիբանանում իր առաջին «էմիր» է նշանակել փախստական սալաֆիական շեյխ Ահմեդ Յասիրին»: Պարբերականը գրում է, որ այդ տեղեկությունները «առաջացնում են մտավախություններ, որ ԴԱԻՇ-ը փորձում է էքսպանսիա իրականացնել Լիբանանի տարածքում՝ պատրաստվելով նոր մարտական գործողությունների»: Թերթը հիշեցնում է, որ «ընդամենը մի քանի օր առաջ ԴԱԻՇ-ի գրոհայինները հարձակում են գործել սիրիա-լիբանանյան սահմանի մոտ՝ սպանելով 8 լիբանանցի զինծառայողի»:
Ավելի վաղ հաղորդվում էր, որ զինված հարձակմանը մասնակցել է ավելի քան 200 զինված ծայրահեղական, ինչը, ըստ փորձագետների, վկայում է Սիրիայի հետ սահմանի մոտ գտնվող Ռաս-Բաալբեք, Էլ-Քաա և Էրսալ քաղաքները գրավելու նրանց մտադրության մասին: Հատուկ գործողության արդյունքում Լիբանանի բանակն ահաբեկիչներին դուրս է մղել սահմանամերձ Թելլեթ-էլ-Համրա և Թելլեթ-Ումմ-Հալեդ ռազմավարական կարևորություն ունեցող բլուրների տարածքից:
Լիբանանի հատուկ ծառայության ղեկավար Աբբաս Իբրահիմի տեղեկությամբ, որը մեջբերում է The Times-ը, 1 ամսում ԴԱԻՇ-ին հաջողվել է իր կողմը գրավել «սիրիացի գրոհայինների ավելի չափավոր միավորումներից մոտ 700 մարտիկի Լիբանանին սահմանակից Կալյամուն շրջանում»: Աբբաս Իբրահիմը նաև նշել է, որ ԴԱԻՇ-ը փորձում է վերահսկողություն հաստատել լիբանանյան տարածքում մի շարք սահմանամերձ տարածքների վրա:
