Ամերիկացի միլիարդատեր Դոնալդ Թրամփը հայտարարել է, որ կառաջադրի իր թեկնածությունը 2016 թվականին ԱՄՆ-ում կայանալիք նախագահական ընտրություններին։ Այս մասին հայտնում է The Independent-ը։ Նրա խոսքով՝ ինքը կլինի միակ արժանի թեկնածուն։
«Ես միակ մարդն եմ, ով կարող է վերադարձնել այս երկրի նախկին մեծությունը։ Դա այն ամենն է, ինչ ես գիտեմ։ Ուրիշ ոչ ոք չի կարող»,- հայտարարել է Թրամփը։
2016-ի ընտրությունների հնարավոր թեկնածուների շարքում են Հիլարի Քլինթոնը, Ջեբ Բուշն ու Միթ Ռոմնին։
Նրա խոսքով՝Ռոմնիին չեն ընտրի, քանի որ նա ունեցել է մեկ հնարավորություն և այն բաց է թողել, նրան այլևս հնարավորություն չեն տա, իսկ Բուշին նույնպես չեն ընտրի, քանի որ նրա խոսքով՝ «մեզ ևս մեկ Բուշ պետք չէ»։
Նախագահական պաշտոնում Թրամփը խոստանում է ողջ երկրում ստեղծել աշխատատեղեր, հաղթել ԴԱԻՇ-ին, կրճատել բյուջեի դեֆիցիտն ու դադարեցնել Իրանում միջուկային զենքի մշակումը։
