Հայաստանի ազգային հավաքականի՝ արտերկրում հանդես եկող գրեթե բոլոր ֆուտբոլիստները վերադարձել են արձակուրդից և վերսկսել են մարզումներն իրենց ակումբների կազմերում, տեղեկացնում է ՀՖՖ-ի պաշտոնական կայքը:
Ազգային հավաքականի դարպասապահ Ռոման Բերեզովսկին այս օրերին Մոսկվայի «Դինամո»-ի կազմում Թուրքիայի Բելեկ քաղաքում է և իր թիմի կազմում պատրաստվում է Եվրոպա Լիգայի խաղարկության 1/16 եզրափակչի բելգիական «Անդերլեխտ»-ի հետ հանդիպումներին:
Մեր ընտրանու առաջատար Հենրիխ Մխիթարյանը, ով վնասվածք էր ստացել դեռևս դեկտեմբեր ամսին, արդեն վերսկսել է մարզումները Դորտմունդի «Բորուսիա»-ի կազմում: Ազգային հավաքականի կիսապաշտպանը վնասվածքից հետո առաջին անգամ է մարզվել ընդհանուր խմբում:
Ռոբերտ Արզումանյանն իր նոր թիմի՝ Պերմի «Ամկար»-ի հետ նույնպես Բելեկում է: Ինչպես ավելի վաղ հայտնել ենք, Հայաստանի ազգային հավաքականի պաշտպանը ղազախական «Ակտոբե»-ից տեղափոխվել է Պերմի «Ամկար» և այդ թիմի կազմում արդեն հասցրել է մասնակցել ղազախական երկու ակումբների՝ «Ատիրաու»-ի և «Օրդաբասի»-ի դեմ ընկերական հանդիպումներին:
Արաս Օզբիլիսը, ով վնասվածք էր ստացել դեռևս մայիսին, շարունակում է վերականգնումը: Մեր ազգային հավաքականի ֆուտբոլիստն արդեն մարզվում է գնդակով և այս օրերին «Սպարտակ-2»-ի հետ կրկին Թուրքիայում է: Ազգային հավաքականի մյուս առաջատարը՝ մեր ընտրանու հարձակվող Յուրա Մովսիսյանը Իսպանիայում է, որտեղ Մոսկվայի «Սպարտակ»-ը անցկացնում է իր մարզական հավաքը:
Ազգային հավաքականի մյուս ֆուտբոլիստները՝ Հովհաննես Համբարձումյանը, Արտակ Դաշյանը և Արթուր Միրանյանը՝ իրենց ակումբի՝ մակեդոնական «Վարդար»-ի կազմում մասնակցում են մարզական հավաքի Ավստրիայում:
Գևորգ Ղազարյանն առայժմ շատ խաղաժամանակ չի ստանում հունական «Օլիմպիակոս»-ի կազմում և մասնակցում է միայն Հունաստանի գավաթի խաղարկության հանդիպումներին:
Կառլեն Մկրտչյանը միացել է իր նոր թիմին՝ ղազախական «Տոբոլ»-ին, որը գլխավորում է Հայաստանի ազգային հավաքականի նախկին գլխավոր մարզիչ Վարդան Մինասյանը:
Այս օրերին «Տոբոլ»-ը նույնպես մարզական հավաք է անցկացնում Թուրքիայում: Արտակ Եդիգարյանը, ով արդեն ապաքինվել է վնասվածքից, իր ակումբի՝ «Ժալգիրիս»-ի կազմում այս օրերին մարզական հավաքի է մասնակցում Բրազիլիայում:
Արտյոմ Սիմոնյանը, ով նախորդ մրցաշրջանում հանդես էր գալիս Սանկտ-Պետերբուրգի «Զենիթ»-ի երկրորդ թիմի կազմում, փորձաշրջան է անցնում շվեյցարական «Ցյուրիխ»-ում:
Մեր ֆուտբոլիստն արդեն մասնակցել է նաև ընկերական հանդիպման: Մարկոս Պիզելլին «Ակտոբե»-ի կազմում մասնակցում է տարվա առաջին մարզական հավաքին, որը կավարտվի այսօր: Դրանից հետո ղազախական ակումբը կանցկացնի ևս մեկ մարզական հավաք Թուրքիայում: Էդգար Մանուչարյանն առայժմ ապաքինվում է վնասվածքից: Արթուր Սարկիսովի թիմը՝ «Վոլգա»-ն, հունվարի 19-ին, ավարտեց իր առաջին մարզական հավաքը Սոչիում:
