Մեծ Բրիտանիայում մոտ մեկ շաբաթ շարունակվող ուժեղ ձյան պատճառով փակ է ավելի քան 5 000 դպրոց: Այս մասին այսօր հայտնել է կրթության նախարար Մայքլ Հոուվը,- փոխանցում է ITAR-TASS-ը:
«Առայժմ որոշումը՝ արժե՞ հաստատությունը բաց թողնել, թե՞ փակել, մնում է դպրոցների ղեկավարների հայեցողությանը: Ամեն բան պետք է արվի, որպեսզի բոլոր երեխաներին հասանելի լինի լավ կրթություն»,- ասել է նա:
Երկրի հարավային, կենտրոնական և արևելյան մասերն աղետի հարվածից ամենից շատ են տուժել, այնտեղ տեղացել է մոտ 90 մմ ձյուն,- փոխանցում է Press Association գործակալությունը: Քաղաքների միջև երկաթուղային հաղորդակցությունը մնում է գործնականորեն նույնը, սակայն շատ չվերթներ հետաձգվել են: Լոնդոնի Հիթրոու օդանավակայանում հետաձգվել է 50 չվերթ, որոնց մեծ մասը ներքին է:
Օդերևութաբանների տվյալներով՝ երեքշաբթի օրը սպասվում է եղանակի լավացում: Ջերմաստիճանը, որն ամբողջ երկուշաբթի մնացել է զրոյական նիշի վրա, կսկսի բարձրանալ և կլինի մոտ 4 աստիճան զրոյից բարձր արևմուտքում և մոտ 2 աստիճան՝ արևելքում:
Վատ եղանակի պատճառով երկու մարդ է զոհվել: Կիրակի օրը Քենթ կոմսությունում՝ հարավ-արևելյան Անգլիայում, ձյան մեջ անգիտակից վիճակում մի կին է հայտնաբերվել, որը մահացել է հիվանդանոցում: Էսեքս կոմսությունում՝ արևելյան Անգլիայում, ավտովթարի հետևանքով մեկ մարդ է զոհվել:
