South Stream Transportation նախագծային ընկերությունը խողովակ արտադրող ընկերություններին տեղեկացրել է «Հարավային հոսքի» շինարարության համար մատակարարումների դադարեցման մասին: Այս մասին ուրբաթ օրը գրում է «Վեդոմոստի» թերթը՝ հղում անելով South Stream-ի կապալառուների շրջանում և «Գազպրոմի» կառույցներից մեկում աղբյուրներին:
Դեկտեմբերի սկզբին Ռուսաստանի նախագահ Վլադիմիր Պուտինը Թուրքիայում բանակցությունների ժամանակ հայտարարել է, որ Ռուսաստանը ներկայիս պայմաններում չի կարող շարունակել «Հարավային հոսք» նախագծի իրականացումը, այդ թվում նաև ԵՄ-ի ոչ կառուցողական դիրքորոշման պատճառով: Ավելի ուշ «Գազպրոմի» ղեկավար Ալեքսեյ Միլլերը հաստատեց, որ «Հարավային հոսք» նախագիծը փակ է:
Դեկտեմբերի սկզբին South Stream-ը հետաձգել է իտալական Saipem-ի հետ պայմանագրով՝ Castoro Sei խողովակադիր նավի փոխադրումը, իսկ այժմ սառեցրել է խողովակների և շինանյութերի պատվերները՝ ասում է նախագծին մասնակցող խողովակ արտադրող ընկերություններից մեկին մոտ աղբյուրը: Որոշումն ընդունել են նախագծային ընկերության բաժնետերերը («Գազպրոմ», Eni, Wintershall և EdF) երկուշաբթի օրը, իսկ արդեն հինգշաբթի օրը խողովակ արտադրող ընկերությունները և այլ կապալառուներ ծանուցում են ստացել սառեցման մասին:
«Հարավային հոսքի» առաջին հոսքագծի կառուցման համար պահանջվել է 680 հազար տոննա խողովակ: Միավորված մետալուրգիական ընկերության և Europipe-ի ներկայացուցիչները չգիտեն պայմանագրերի սառեցման մասին: Նրանք նշել են, որ առաջին հոսքագծի մատակարարումները շարունակվում են: Ապրանքի համար վճարվում է այն ժամանակ, երբ այն հասնում է Բուլղարիայի ափ:
«Սևերստալի» ներկայացուցիչը հրաժարվել է մեկնաբանությունից: «Գազպրոմի» կառույցներից մեկին մոտ աղբյուրը հաստատել է, որ խողովակ արտադրող ընկերություններն արդեն ծանուցվել են սառեցման մասին:
