2013թ. համաշխարհային տնտեսությունը կաճի 2.4%-ով, 2014թ. աճը կկազմի 3.1%, իսկ 2015թ.՝ 3.3%: Անցած տարի համաշխարհային ՀՆԱ-ն աճել է 2.5%-ով: Այս մասին հաղորդում է Vesti-ն՝ վկայակոչելով համաշխարհային բանկի Global Economic Prospects զեկույցը:
Այսպիսով, Համաշխարհային բանկն իջեցրել է 2013թ. համաշխարհային տնտեսության աճի կանխատեսումը: Փորձագետները նաև նախազգուշացնում են, որ ԱՄՆ-ում բյուջեի և պետական պարտքի վերին սահմանի մասին վեճերը կարող են վնաս հասցնել համաշխարհային տնտեսությանը:
Global Economic Prospects-ի գլխավոր հեղինակ Էնդրյու Բերնսը հայտարարել է, որ վերականգնումը, որը բանկն ակնկալում էր անցած տարի, ակնկալվում է 2013թ. առաջին եռամսյակի վերջում և երկրորդ եռամսյակում:
Մինչև 5.5% իջեցվել է նաև կանխատեսումը զարգացող երկրների համար, ի տարբերություն 2012թ. հունիս ամսվա 5.9% կանխատեսման: Բանկը նշել է, որ 2015թ. այս ցուցանիշը կկազմի 5.7%, իսկ 2015թ.՝ 5.8%:
Համաշխարհային բանկի փորձագետներն ակնկալում են, որ այս տարի Չինաստանի տնտեսությունը կաճի 8.4%-ով, իսկ մինչև 2015թ. կնվազի մինչև 7.9%: Զարգացած տնտեսություն ունեցող երկրներում 2013թ. աճը կկազմի 1.3%, ինչը պայմանավորված է ծախսերի կրճատմամբ, գործազրկության բարձր մակարդակով: 2014թ. այդ ցուցանիշը պետք է մեծանա 2%-ով, իսկ 2015թ.՝ 2.3%-ով:
Ակնկալվում է, որ 2013թ. ԱՄՆ-ում աճի տեմպերը կդանդաղեն մինչև 1.9%, իսկ արդեն 2014թ. այն կաճի մինչև 2.8%, 2015թ.՝ մինչև 3%:
Եվրոգոտու ՀՆԱ-ն ընթացիկ տարում կկրճատվի 0.1%-ով, իսկ 2014թ. տնտեսական աճը կվերականգնվի և կկազմի 0.9%, 2015թ. մինչև 1.4%:
