Մեծ Բրիտանիայի լորդերի պալատի անդամները հանդես են եկել թմրանյութերի օրինականացման պաշտպանությամբ։ Նրանք իրենց դիրքորոշումը պատճառաբանում են նրանով, որ մտահոգված են երիտասարդության համար. վերջիններս չեն վազի էժանագին թմբիրի հետևից, եթե թմրամիջոցների բաշխումը վերահսկվի։ Այս մասին հաղորդում է BBC-ն։
Խոսքը բացառապես սինթետիկ թմրանյութերի մասին է, որոնք վերջերս լայն տարածում են գտել անչափահասների շրջանում։ Ծնողներն անակնկալի են գալիս, երբ մանկավարժներն իրենց ցույց են տալիս դպրոցի և պարասրահների արտաքնոցներից գտած թմրանյութերի օգտագործման հարմարությունների թափոնները։
Բրիտանացի փորձագետների խումբ է կազմվել, որի մեջ ներառված են գիտնականներ, բժիշկներ, իրավապահներ։ Նրանք հորդորում են օրինականացնել թմրանյութերի վաճառքը՝ մատաղ սերնդին փրկելու համար։ Լորդերի պալատի անդամների կարծիքով՝ վաճառքը պետք է իրականացվի հատուկ խանութներում՝ տալով նրանց հատուկ թույլտվություններ։ Պետք է իրազեկում լինի թմրանյութի բաղադրության, օգտագործման եղանակի և հնարավոր հետևանքների մասին։
Ազնվական պատգամավորները համոզված են, որ այդ միջոցներն ավելի անվտանգ են անչափահասների համար, քան մարիխուանան և ալկոհոլը։ Մինչև 18 տարեկան անձանց թմրամիջոցների վաճառքը և գովազդն ընդհանրապես պետք է արգելվի։ Ներկայումս քննարկվում է, թե որ թմրամիջոցը պետք է համարել վտանգավոր, որը՝ ոչ։
Սակայն, բնականաբար, օրինագիծն ունի նաև տասնյակ ընդդիմախոսներ։ Այնպես որ, դեռևս վաղ է ակնկալել, որ «քիչ թե շատ անվտանգ» թմրանյութերը կօրինականացվեն։