Թեև ՀՀ իշխանությունները վստահեցնում են, թե ԵՏՄ գնալով՝ հայտնվելու ենք դրախտում ու դա բխում է մեր շահերից, դա այդպես չէ: Այսօր ԱԺ-ում «ՀՀ՝ ԵՏՄ մասին 2014թ. մայիսի 29-ի պայմանագրին միանալու վերաբերյալ» թեմայով խորհրդարանական լսումներին ամբիոնից հայտարարեց «Ժառագության» պատգամավոր Զարուհի Փոստանջյանը:
Նա խոսեց նաև ԼՂ հիմնախնդրից և մասնավորապես ՀՀ կողմից նրա անկախության ճանաչման մասին. «Մենք, չճանաչելով ԼՂՀ անկախությունը, փաստորեն թույլ ենք տալիս ԵՏՄ-ին մեր սահմանին մաքսակետ մտցնել: Մենք իրավունք չունենք օտար ոտք բերել ու մեր սահմանին դնել: Ռուսները ոնց եկել են, էնպես էլ կգնան: Սերժ Սարգսյանի վարած քաղաքականությունը և ԵՏՄ անդամակցումը համարում ենք պետական դավաճանություն: Ովքեր դեմ չքվեարկեն այս նախագծին, նրանք եւս կհամարվեն դավաճաններ»:
Նրա ելույթին անմիջապես սկսեցին արձագանքել ՀՀԿ պատգամավորները: «Ձեզ մի քիչ կոռեկտ պահեք»,- արձագանքեց ՀՀԿ պատգամավոր Սուքիաս Ավետիսյանը: «Պորտից ներքև, ասել եմ, չիջնել»,-հայտարարեց նիստը նախագահող ՀՀԿ պատգամավոր Վարդան Այվազյանը: «Դա էլ մեր դժբախտությունն է, ինչ անենք»,- արձագանքեց նաև մյուս նախագահողը՝ Արտակ Զաքարյանը:
