RR de Acuña & Asociados-ն ակնկալում է, որ մինչև 2018-ը Մադրիդում, Բարսելոնայում և Իսպանիայի այլ խոշոր քաղաքներում տների գինը կնվազի ևս 30%-ով, բայց իրավիճակը կարող է ավելի վատ լինել շրջաններում, որտեղ ապրում է կամ անշարժ գույք ունի մոտ 400,000 բրիտանացի, հայտնում է vestifinance.ru-ն:
10-15 տարվա ընթացքում անշարժ գույքը կարող է էժանանալ 50%-ով այն վայրերում, որտեղ շինարարությունը շարունակվել է նույնիսկ այն ժամանակ, երբ «փուչիկն» արդեն ակնհայտ է եղել: Այդ ժամանակ գները կնվազեն մոտ 75%-ով իրենց առավելագույնի համեմատությամբ:
«Շուկան չի գործում,- հայտարարել է ընկերության փոխնախագահ Ֆերնանդո Ռոդրիգես դե Ակունյան:- Մեր գնահատմամբ՝ կա մոտ 2 մլն օբյեկտ, որոնք պետք է վաճառվեն: Մենք առաջընթաց չենք արձանագրել վերջին 5 տարում»:
Նա շուկայում տիրող վիճակը «խելահեղություն» է անվանել: Բնակելի անշարժ գույքի տարեկան պահանջարկն ընդամենը 200,000 է: Իրավիճակը կապված է երկրից աշխատուժի հեռանալու և բնակչության աստիճանական ծերացման հետ:
ԱՄՀ-ը 2013-ին կանխատեսում է ՀՆԱ-ի անկում 1.3%-ով, իսկ Citigroup-ն ու Nomura-ն անկում են կանխատեսում նաև 2014-ին: Իսպանիայում գործազրկության մակարդակը 26.2% է և շարունակում է աճել:
Ռոդրիգես դե Ակունյան նշում է, որ անշարժ գույքի շուկայում անկումը մեծապես տարբեր է երկրի շրջաններում, բայց Տոլեդոյի վերջին տվյալները ապշեցրել են վերլուծաբաններին: Santander-ը վերջերս գներն իջեցրել է 60%-ով, որպեսզի ազատվի պահուստներից, Banco Sabadel-ը նույն կերպ է վարվել՝ գներն իջեցնելով 70%-ով: Մեկ այլ խոշոր բանկ դադարեցրել է Տոլեդոյում անշարժ գույքի առուվաճառքը, քանի որ գները չափազանց շատ են իջել:
Նոյեմբերին հայտնի դարձավ, որ Իսպանիան պատրաստվում է բնակության իրավունք առաջարկել օտարերկրացիներին, որոնք 160,000 եվրոյից թանկ բնակարան են գնում: 2011-ին օտարերկրացիներն Իսպանիայում 6%-ով ավելի շատ բնակարան են գնել, քան 2010-ին:
