Եթե Արևմուտքը չհաջողեց փարիզյան հանդիպումը, ապա դա կփորձի անել Ռուսաստանը: «Առաջին լրատվական»-ի հետ զրույցում նման տեսակետ հայտնեց Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն՝ անդրադառնալով Ֆրանսիայի նախագահ Ֆրանսուա Օլանդի նախաձեռնությամբ Փարիզում կայացած Ալիև-Սարգսյան բանակցություններին:
Ահմեդօղլուն նշեց, որ նախագահների հանդիպումը կարելի է դիտարկել որպես մեկ քայլ ետ բանակցություններում, քանի որ այն դեպքում, երբ Արևմուտքը մեծ հույսեր էր կապում այս հանդիպման հետ, պարզ դարձավ, որ Արևմուտքի ազդեցությունը ԼՂ հակամարտության գոտում և Հարավային Կովկասում էլ ավելի է նվազել ՌԴ-ի հետ առճակատման արդյունքում: Նրա դիտարկումներով՝ սա նախագահական մակարդակով այն քիչ հանդիպումներից մեկն էր, որից հետո չեղավ ԵԱՀԿ ՄԽ համանախագահների հայտարարություն: Ադրբեջանցի փորձագետը այս հանգամանքը բավականին բացասական է համարում:
«Այս հանդիպումից սպասումները մեծ էին, բայց արդյունքներն այնքան անսպասելի էին համանախագահների համար, որ նրանք չեն կարողացել պարզապես եզրափակիչ հայտարարություն կազմել: Սովորաբար նախագահների մակարդակով հանդիպումների գլխավոր արդյունքը ՄԽ համանախագահների հայտարարությունն է, իսկ դա չեղավ: Ուստի ես կարծում եմ, որ սա անհանգստացնող է:
Օլանդին պետք է շնորհակալ լինել այսպիսի բացառիկ ձևաչափով հանդիպում կազմակերպելու համար: Կարելի է ասել, որ նրան հաջողվեց լավ ձևաչափ կազմակերպել իր տեսակի մեջ առանձնահատուկ ՄԽ պատմության մեջ, որի արդյունքները գոհացուցիչ համարել չի կարելի: Մեծ համաձայնագրի շուրջ դեռ պետք է սկսել աշխատել: Հայաստանն իր կարծիքը չի հայտնել դրա վերաբերյալ, և մեզ ևս հայտնի չէ, թե ինչ ասել է գլոբալ համաձայնություն»,- մեկնաբանեց ադրբեջանցի փորձագետը՝ հավելելով, որ ողջ Արևմուտքը արդյունքի էր սպասում, բայց չհաջողվեց:
«Եթե աշխարհաքաղաքական բախման արդյունքում Արևմուտքը չի կարողանում հաջողել, Ռուսաստանը դա կփորձի անել»,- նկատեց նա:
Հիշեցնենք, որ օրերս Փարիզի Մարինյի պալատում անցկացվեցին Ֆրանսիայի նախագահ Ֆրանսուա Օլանդի նախաձեռնությամբ հոկտեմբերի 27-ին ԼՂ հիմնահարցի կարգավորմանն ուղղված բանակցությունները: Ֆրանսիայի նախագահի հետ առավոտյան կայացած առանձնազրույցներից հետո Հայաստանի և Ադրբեջանի նախագահները բանակցություններ վարեցին ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ, ապա տեղի ունեցավ Սերժ Սարգսյանի և Իլհամ Ալիևի առանձնազրույցը: Բանակցությունների արդյունքներն ուշ երեկոյան ամփոփվեցին նախագահներ Ֆրանսուա Օլանդի, Սերժ Սարգսյանի, Իլհամ Ալիևի և ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ջեյմս Ուորլիքի (ԱՄՆ), Պիեռ Անդիոյի (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկի համատեղ հանդիպման ժամանակ:
Խաղաղ բանակցություններում առաջընթաց արձանագրելու համար հանդիպման մասնակիցները կարևորել էին ԵԱՀԿ Մինսկի խմբի համանախագահության շրջանակներում երկխոսության շարունակումը և վստահության ամրապնդման ուղղությամբ ջանքերը: Ընդգծվել է հակամարտության խաղաղ կարգավորման այլընտրանքի բացակայությունը: Պայմանավորվածություն է ձեռք բերվել կողմերի միջև շարունակել բարձր մակարդակի բանակցությունները:
