Միչիգան նահանգի հարբած բնակչուհին բանտը շփոթել է բարի հետ: Ինչպես հայտնում է Associated Press-ը, 39-ամյա ամերիկուհին ձերբակալվել է շենք մուտք գործելու համառ փորձերից հետո:
Դեպքը տեղի է ունեցել Պաու Պաու քաղաքում՝ կիրակի օրը: Fox17-ի տվյալներով՝ կինը գտնվել է քաղաքի բարերից մեկում ու որոշել ուղևորվել մեկ այլ բար: Նա նստել է մեքենան ու ուղևորվել այնտեղ, որտեղ, ինչպես ավելի ուշ հաղորդել է նա՝ իրեն սպասում էր իր ընկերը: Սակայն ճանապարհին նա շփոթել է շենքերը ու հայտնվել Վան-Բյուրեն շրջանի բանտի կայանատեղիում:
Նրա համառ փորձերը՝ մտնել հաստատություն և հանդիպել ընկերոջը, հանդիպել են իրավապահ մարմինների աշխատակիցների դիմադրությանը: Նրանք զգալով սպիրտի հոտը՝ անցկացրել են ալկոհոլի թեստ: Նրա արյան մեջ ալկոհոլի պարունակությունը կրկնակի գերազանցել է թույլատրելի նորման:
Կինը ձերբակալվել է, նրան առաջադրվել է անսթափ վիճակում մեքենա վարելու մեղադրանք: